გერმანიაში ულტრამემარჯვენეების წინააღმდეგ მასობრივი საპროტესტო აქციები გაიმართა

გერმანიის ათობით ქალაქში, ულტრამემარჯვენეებისა და პარტია „ალტერნატივა გერმანიისთვის“ საწინააღმდეგო დემონსტრაციები გაიმართა. ამის შესახებ BBC წერს.

გამოცემის ინფორმაციით, აქციები გაიმართა ბერლინში, პოტსდამში, კიოლნში, ყველაზე მასობრივი დემონსტრაცია კი ჰამბურგში მოეწყო, რომელსაც სხვადასხვა მონაცემებით 50-დან 80 ათასამდე ადამიანი დაესწრო.

დემონსტრაციები მას შემდეგ დაიწყო, რაც გამოცემამ Corrective გამოაქვეყნა გამოძიება ულტრამემარჯვენე ექსტრემისტებისა და ნეონაცისტების საიდუმლო შეხვედრის შესახებ, რომელსაც „ალტერნატივა გერმანიისთვის“ წევრებიც ესწრებოდნენ. გამოცემის ცნობით, შეხვედრა გასული წლის ნოემბერში გაიმართა და მასზე განიხილეს ე.წ. რეემიგრაციის საკითხი - მილიონობით ადამიანის დეპორტაცია, მათ შორის მიგრანტებისა და არაასიმილირებული მოქალაქეების, იმ შემთხვევაშიც კი თუ მათ გერმანიის მოქალაქეობა აქვთ.

ბევრმა მიიჩნია, რომ ეს იდეები ნაცისტების პოლიტიკის მსგავსია, ამიტომ აქციების მონაწილეები პარტიის აკრძალვას მოითხოვენ. გერმანიის პოლიტიკურ წრეებში კი განიხილავენ, რამდენად შესაძლებელია ეს იურიდიულად და შიშობენ, რომ შესაძლოა ასეთმა ნაბიჯმა საზოგადოებაში ექსტრემისტული განწყობების პოპულარობის ზრდას შეუწყოს ხელი.

პარტიის წარმომადგენლებმა აღშფოთება გამოთქვეს და აღნიშნეს, რომ პარტიის აკრძალვის იდეა დემოკრატიაზე თავდასხმაა.