მოსამართლეს, რომელმაც ტრამპის განკარგულება შეაჩერა, Washington Post-ი წერილს უძღვნის

"გაიცანით ფედერალური მოსამართლე ენ დონელი, რომელმაც შეაჩერა ტრამპის დეპორტაციები სირიელთა გადასარჩენად", - ამ სათაურით აქვეყნებს ვრცელ წერილს ახლგაზრდა მოსამართლე ქალზე ამერიკული Washington Post-ი.

სტატია მოსამართლის პროფესიული და ადამიანური პორტრეტია. გაზეთი წერს, რომ ენ დონელი ნახევარი წელი ელოდებოდა მისი კანდიდატურის დამტკიცებას სენატში და ცდილობდა კანონმდებლები დაერწმუნებინა, რომ ის კარგი ფედერალური მოსამართლე იქნებოდა. ხოლო ეს დღე როდესაც დადგა, მან ცერემონიაზე ოჯახის ყველა წევრი და ნათესავი მიიყვანა და შესავალ სიტყვაში ყველა სახელობით ჩამოთვალა. "სენატორებს მან გააცნო თავისი მეუღლე მაიკლი, და სარა და ძმა თომასი. შემდეგ კი მათი მეუღლეები და ოთხი შვილი", - წერს Post-ი.      

სტატიის ავტორი დონელის გულისხმიერ ადამიანად წარმოაჩენს და უწონებს მას 29 იანვრის თამამ გადაწყვეტილებას, რომელმაც შეუქმნა პირველი სამართლებრივი ბარიერი ახლადარჩეულ პრეზიდენტს მისი სადავო მიგრაციული პოლიტიკის გზაზე.

პარასკევს დონალდ ტრამპმა ხელი მოაწერა განკარგულებას, რომელიც 120 დღით წყვეტს დევნილების აშშ-ში მიღებას, კრძალავს სირიიდან დევნილების განუსაზღვრელი ვადით ყოფნას და ამკაცრებს აშშ-ში შესვლის ზოგიერთ წესს, ასევე 90 დღით აჩერებს ქვეყანაში რამდენიმე მუსლიმური ქვეყნის მოქალაქეების შესვლას. დოკუმენტის გამოცემისთანავე, ამერიკის აეროპორტებში მიგრანტების დაკავება დაიწყეს, რასაც მთელი ქვეყნის მასშტაბით უფლებადამცველების და რიგითი მოქალაქეების საპროტესტო გამოსვლები მოჰყვა.

ნიუ-იორკის საოლქო სასამართლოს მოსამართლე ენ დონელიმ, რომელიც მანამდე პროკურორადაც მუშობდა, ტრამპის განკარგულების მოქმედება შეაჩერა და შეერთებულ შტატებში უკვე ჩასული მიგრანტები სამართლებრივი დევნისგან გაათავისუფლა. მოსამართლის გადაწყვეტილება იმ პირებზეც გავრცელდა, ვისაც შეერთებული შტატების ვიზა უკვე მიღებული აქვს.

Twitter-ის ერთ-ერთი მომხმარებელი თავის გვერდზე ენ დონელის ფოტოს აქვეყნებს მინაწერით: დაიმახსოვრეთ ეს სახელი. დაიმახსოვრეთ ეს სახე. გმადლობთ, მოსამართლე ენ დონელივ!
 

Remember the name. Remember the face. Thank you, U.S. District Judge Ann Donnelly. #ACLU #MuslimBan @realDonaldTrump don't attack her. pic.twitter.com/J3DX7MF1m3

— Bill Marler (@bmarler) January 29, 2017