გერმანიის კანცლერობის კანდიდატი: გერმანიას შეუძლია განიხილოს უკრაინაში სამშვიდობო ძალებში მონაწილეობა, თუ რუსეთთან კონსენსუსი იქნება მიღწეული

გერმანიის კანცლერობის კანდიდატმა და „ქრისტიან-დემოკრატიული კავშირის“ ლიდერმა, ფრიდრიხ მერცმა განაცხადა, რომ გერმანიას შეუძლია განიხილოს უკრაინაში სამშვიდობო ძალებში მონაწილეობა, თუ რუსეთთან კონსენსუსი იქნება მიღწეული.

ფრიდრიხ მერცმა აღნიშნა, რომ გერმანიისთვის სამშვიდობო ოპერაციებში მონაწილეობის მისაღებად საჭიროა მანდატი, რომელიც შეესაბამება საერთაშორისო სამართალს.

თუმცა, მისი აზრით, უმთავრესი ფაქტორი რუსეთის თანხმობაა, რომლის გარეშეც მსგავსი მისია არ იქნება ეფექტური და შესაძლოა სიტუაციის ესკალაცია გამოიწვიოს.

„თუ სამშვიდობო შეთანხმება მიღწეული იქნება და უკრაინა უსაფრთხოების გარანტიებს მოითხოვს, მაშინ ამის განხილვა მხოლოდ იმ შემთხვევაში შეგვიძლია, თუ იქნება მკაფიო მანდატი საერთაშორისო სამართლის შესაბამისად. მე მას ახლა ვერ ვხედავ. მე მინდა, რომ ასეთი მანდატი უზრუნველყოფილი იყოს რუსეთთან კონსენსუსით და არა კონფლიქტით“, - განაცხადა მან.