ვოლოდიმირ ზელენსკი: მსურველთა კოალიციის შეხვედრაზე რამდენიმე სახელმწიფოს ჰქონდა შემოთავაზება ჯარების განლაგებაზე. ვისურვებდი, ეს დღესვე მოხდეს

უკრაინის პრეზიდენტის თქმით, მას დღესვე სურს, რომ ბრიტანეთის ჯარი უკრაინა-ბელარუსის საზღვრის დასაცავად განლაგდეს. ვოლოდიმირ ზელენსკიმ განაცხადა, რომ ამ თემაზე მსურველთა კოალიციის ლიდერებსაც ესაუბრა. მისი თქმით, უკრაინაში ჯარების განლაგების სურვილი ევროპელმა ლიდერებმა მხოლოდ მშვიდობის მიღწევის შემდეგ გამოთქვეს. თავად ზელენსკის თქმით, სამშვიდობო პროცესები უფრო დაჩქარდებოდა, თუკი ევროპელი პარტნიორების ჯარები ცეცხლის შეწყვეტამდე დაეხმარებოდნენ.

„ამ თემაზე საუბარი მქონდა ევროპელ ლიდერებთან და ამერიკის შეერთებულ შტატებთან. მსურველთა კოალიციის შეხვედრაზე რამდენიმე სახელმწიფოს ჰქონდა შემოთავაზება ჯარების განლაგებაზე. ეს იდეა ჰქონდათ ფრანგებსა და გაერთიანებული სამეფოს ლიდერებს. ცხადია, ჩვენ ეს გვსურს, თუმცა ვისურვებდი, ეს დღესვე მოხდეს. ლიდერების შეთავაზებაა, რომ ჯარები განლაგდეს ცეცხლის შეწყვეტის შემდეგ. შესანიშნავი იდეა იქნებოდა, რომ საზღვარზე იქამდე განლაგდნენ. ცხადია, ეს და ბევრი სხვა საკითხი წამოვაყენე ლიდერებთან, თუმცა ეს სიფრთხილით უნდა გააკეთო, რადგან ევროპელ ლიდერებს საკუთარი საზოგადოების ეშინიათ და არ სურთ ომში პირდაპირ ჩაერთონ“, - განაცხადა ზელენსკიმ.