აშშ-ის ეროვნული უსაფრთხოების სტრატეგია: ევროპელთა დიდ უმრავლესობას სურს მშვიდობა, თუმცა ეს სურვილი პოლიტიკაში არ აისახება, დიდწილად ამ მთავრობების მიერ დემოკრატიული პროცესების ძირის გამოთხრის გამო

ევროპელთა დიდ უმრავლესობას სურს მშვიდობა, თუმცა ეს სურვილი პოლიტიკაში არ აისახება, დიდწილად ამ მთავრობების მიერ დემოკრატიული პროცესების ძირის გამოთხრის გამო, - ნათქვამია ამერიკის შეერთებული შტატების ეროვნული უსაფრთხოების სტრატეგიაში, რომელიც თეთრი სახლის ვებ-გვერდზე გამოქვეყნდა.

დოკუმენტის თანახმად, ეს სტრატეგიულად მნიშვნელოვანია ამერიკის შეერთებული შტატებისთვის სწორედ იმიტომ, რომ ევროპულ სახელმწიფოებს არ შეუძლიათ თვითრეფორმა, თუ ისინი პოლიტიკურ კრიზისში არიან ჩარჩენილი.

ამერიკა მოუწოდებს თავის პოლიტიკურ მოკავშირეებს ევროპაში, ხელი შეუწყონ სულიერ აღორძინებას და პატრიოტული ევროპული პარტიების მზარდი გავლენა მართლაც დიდ ოპტიმიზმს იწვევს.

„ჩვენი მიზანი უნდა იყოს დავეხმაროთ ევროპას, შეასწოროს მისი ამჟამინდელი ტრაექტორია. ჩვენ გვჭირდება ძლიერი ევროპა, რათა დაგვეხმაროს წარმატებულ კონკურენციაში და ითანამშრომლოს ჩვენთან, რათა ნებისმიერ მოწინააღმდეგეს ხელი შეეშალოს ევროპაზე დომინირებაში.

გრძელვადიან პერსპექტივაში, სავსებით დასაშვებია, რომ სულ მცირე, რამდენიმე ათწლეულის განმავლობაში, ნატოს ზოგიერთი წევრი გახდება უმრავლესობით არაევროპული. შესაბამისად, ღია კითხვად რჩება, შეხედავენ თუ არა ისინი თავიანთ ადგილს მსოფლიოში, ან შეერთებულ შტატებთან ალიანსს, ისევე, როგორც ამას უყურებდნენ ნატოს წესდებაზე ხელმომწერები.

ჩვენმა ზოგადმა პოლიტიკამ ევროპის მიმართ პრიორიტეტულად უნდა მიიჩნიოს:

• ევროპის შიგნით სტაბილურობის პირობების ხელახლა დამყარება და რუსეთთან სტრატეგიული სტაბილურობა;
• ევროპისთვის საკუთარ ფეხზე დგომის და შეთანხმებული სუვერენული ერების ჯგუფად ფუნქციონირების უზრუნველყოფა, მათ შორის საკუთარ თავდაცვაზე ძირითადი პასუხისმგებლობის აღებით, ნებისმიერი მოწინააღმდეგე ძალის დომინირების გარეშე;
• ევროპის ამჟამინდელი ტრაექტორიისადმი წინააღმდეგობის გაღვივება ევროპულ ერებში;
• ევროპული ბაზრების გახსნა აშშ-ის საქონლისა და მომსახურებისთვის და აშშ-ის მუშაკებისა და ბიზნესების სამართლიანი მოპყრობის უზრუნველყოფა;
• ცენტრალური, აღმოსავლეთ და სამხრეთ ევროპის ჯანსაღი ერების გაძლიერება კომერციული კავშირების, იარაღის გაყიდვების, პოლიტიკური თანამშრომლობისა და კულტურული და საგანმანათლებლო გაცვლების მეშვეობით;
• ნატოს, როგორც მუდმივად გაფართოებადი ალიანსის, აღქმის დასრულება და ამ რეალობის თავიდან აცილება;
• ევროპის წახალისება, მიიღოს ზომები ტექნოლოგიური ქურდობის, კიბერ-ჯაშუშობისა და სხვა მტრული ეკონომიკური პრაქტიკის წინააღმდეგ საბრძოლველად“, - წერია დოკუმენტში.