New York Post: ევროპელები არიან პაციფისტები, რომლებსაც ომის გაჭიანურება სურთ, მეომრები, რომლებსაც ხმლები არ აქვთ, სტრატეგოსები, რომლებსაც არაფერი გაეგებათ

ევროპელები არიან პაციფისტები, რომლებსაც ომის გაჭიანურება სურთ, მეომრები, რომლებსაც ხმლები არ აქვთ, სტრატეგოსები, რომლებსაც არაფერი გაეგებათ და მოკავშირეები, რომლებიც შეთქმულებას აწყობენ და დასცინიან თავიანთ ამერიკელ მფარველსა და დამცველს, როდესაც ეს უკანასკნელი ცდილობს დაასრულოს ომი, რომლის დაწყებასაც მათმა ამპარტავნებამ შეუწყო ხელი, - წერს გამოცემა New York Post-ი სტატიაში სათაურით სათაურით „უუნარო ევროპელებს მხოლოდ ქოთქოთი შეუძლიათ, მაშინ როცა ტრამპი სრულიად სამართლიანად აშორებს მათ უკრაინის საკითხს“.

სტატიის ავტორის თქმით, „ბავშვების მსგავსად, ევროპელებს სურთ, თავიანთი მოუმწიფებლობის შედეგებს დაუსხლტდნენ, თანაც ფეხების ბაკუნით გამოხატავენ უკმაყოფილებას, რომ უფროსები უსამართლონი არიან და ხელს იშვერენ დამატებითი ფინანსური დახმარებისთვის“.

„მათ არა მხოლოდ დიდი ნაჭერი სურთ, როცა ნამცხვარი იჭრება - მათ ასევე სურთ დანის გამოყენება და მაგიდასთან ადგილების განლაგების დადგენა. მაგრამ ეს მათი წვეულება არ არის. ევროპული წარმოსახვის პარალელურ სამყაროში, უკრაინის თავდაცვას სწორედ ევროპა უჭერდა მხარს. სინამდვილეში კი, ევროპამ ამერიკის შეერთებულ შტატებთან ერთად გაიყო ევროპის ტერიტორიაზე მიმდინარე ომის ხარჯები - კრიტიკულ იარაღს კი აშშ აწვდიდა“, - ნათქვამია სტატიაში.

„ევროპულ ოცნებებსა და რეალობას შორის დისბალანსი მხოლოდ ფულს არ ეხება. საქმე კუნთებშია. ევროპა უკრაინის შესახებ მკაცრად საუბრობდა, ამასობაში კი ამერიკის უსაფრთხოების ქოლგის ქვეშ იმალებოდა, მიუხედავად იმისა, რომ იციან, ნატო სხვა სახელით ამერიკული ძალაა. აქ რეალური საფრთხე არსებობს: ეს არის გამოფიტვის ომი, რიცხვების თამაში. სამშვიდობო შეთანხმების არარსებობა მეტ ომს ნიშნავს — ომს, რომელსაც ევროპელები მარტო ვერ დაუჭერენ მხარს და რომელშიც უკრაინა ვერ გაიმარჯვებს. ევროპის მიერ ტრამპის შეთანხმების დაბრკოლება პუტინისთვის საჩუქარია“, - წერს სტატიის ავტორი.

სტატიაში ხაზგასმით აღნიშნულია, რომ „ევროპელები ცდილობენ, მოლაპარაკების მაგიდასთან ადგილი შეინარჩუნონ, თუნდაც ეს პუტინის აგრესიის დაჯილდოებას ნიშნავდეს, თუმცა ომის კიდევ ერთი რაუნდი შეიძლება უკრაინისთვის საბედისწერო აღმოჩნდეს“.

„აგვისტოში, დიდმა ბრიტანეთმა და საფრანგეთმა ღაზაში ცეცხლის შეწყვეტის შესახებ ამერიკული ძალისხმევა ჩაშალეს პალესტინის სახელმწიფოს აღიარებით. მიუხედავად ამისა, ტრამპმა ღაზის შესახებ შეთანხმებას მაინც მიაღწია. ევროპელები ახლო აღმოსავლეთში არასდროს ყოფილან ასეთი არარელევანტურები. ახლა ტრამპი მტკიცედ განწყობილია, უკრაინის შესახებ შეთანხმებასაც მიაღწიოს, ხოლო ევროპელები საკუთარ ტერიტორიაზეც არარელევანტურები ხდებიან. ზრდასრულებმა უკრაინის შესახებ ეს წინადადება ევროპელების გვერდის ავლით შეათანხმეს. რა თქმა უნდა, ევროპელები თავს დამცირებულად გრძნობენ; აშშ და რუსეთი ევროპის მომავალს ევროპელებთან კონსულტაციის გარეშე აყალიბებენ. მაგრამ თუ ბავშვივით მოიქცევი, ბავშვივით მოგექცევიან“, - დასძინა სტატიის ავტორმა.