The New York Times: პენტაგონის ხელმძღვანელი გენერალ კავოლის გადაყენებას ითხოვდა რუსული საფრთხის შესახებ გაკეთებული განცხადებების გამო

პენტაგონის ხელმძღვანელი, პიტ ჰეგსეტი ითხოვდა ევროპაში აშშ-ის შეიარაღებული ძალებისა და ნატოს მთავარსარდლის, გენერალ კრისტოფერ კავოლის გადაყენებას, რომელიც აპრილში სენატის კომიტეტის წინაშე გამოსვლისას ამტკიცებდა, რომ რუსეთი „ქრონიკულ“ და „მზარდ“ საფრთხეს წარმოადგენს. ამის შესახებ აღნიშნულია გაზეთ The New York Times-ის გამოძიებაში.

სტატიის თანახმად, აპრილის დასაწყისში CNN-ის ჟურნალისტმა, ნატაშა ბერტრანმა სოციალურ ქსელ X-ზე გამოაქვეყნა პოსტი, რომელშიც ციტირებდა გენერლის გამოსვლას სენატის კომიტეტის წინაშე იმის შესახებ, რომ რუსეთი „ქრონიკულ“ და „მზარდ“ საფრთხეს წარმოადგენს.

თანაშემწეებმა ეს პოსტი პიტ ჰეგსეტს გადაუგზავნეს, როგორც იმის მტკიცებულება, რომ გენერალი ძირს უთხრის ვლადიმირ პუტინის კეთილგანწყობის მოპოვებისკენ მიმართულ ძალისხმევას.

„გაათავისუფლეთ თანამდებობიდან კავოლი“, - უთხრა მაშინ ჰეგსეტმა თავის მთავარ თანაშემწეს, ჯო კასპერს იმ ოფიციალური პირების თქმით, რომლებიც ამ საუბრის საქმის კურსში იყვნენ.

გენერალი კავოლი შეიძლება გამხდარიყო სულ მცირე იმ ორი ათეული მაღალი რანგის სამხედრო პირიდან ერთ-ერთი, რომლებიც თავდაცვის მდივანმა თანამდებობიდან გაათავისუფლა, რომ არა კასპერის მითითება იმის შესახებ, რომ ევროპელი გენერალი დროებით გააკონტროლებდა აშშ-ის ბირთვულ ძალებს ევროპაში. ივლისში ის გეგმურად შეცვალა გენერალმა გრინკევიჩმა.

ჰეგსეტმა კავოლის დაურეკა - ოფიციალური წარმომადგენლის თქმით, რომელიც საუბრის საქმის კურსში იყო - და უთხრა, რომ თავისი „სიტყვებით, ქცევითა და ჩვენებებით“ იგი პრეზიდენტის ავტორიტეტს ძირს უთხრიდა.

„საქმე იმაში კი არ არის, რაც თქვით, არამედ იმაში, რაც არ გითქვამთ“, - განაცხადა მაშინ ჰეგსეტმა.

„თქვენ არაფერი გითქვამთ ცეცხლის შეწყვეტაზე, არაფერი გითქვამთ მშვიდობაზე და არაფერი გითქვამთ მოლაპარაკებებზე“, - დასძინა მან.