Le Monde: შინაარსობრივად, რუბიოს გზავნილი მიუნხენში ისეთივე იყო, როგორიც ვენსის

მქუხარე ოვაციები, რომლითაც მიესალმნენ მარკო რუბიოს გამოსვლას მიუნხენის უსაფრთხოების კონფერენციაზე, ხანმოკლე აღმოჩნდა - მალევე გაირკვა, რომ ეს პატივისცემის გამოხატვა ერთსულოვანი არ ყოფილა, - წერს ფრანგული გამოცემა Le Monde სტატიაში სათაურით „შინაარსობრივად, რუბიოს გზავნილი მიუნხენში ისეთივე იყო, როგორიც ვენსის“.

„კვირა დილისთვის, კონფერენციის დასკვნით დღეს - როდესაც ამერიკელი მონაწილეების უმეტესობას იქაურობა უკვე დატოვებული ჰქონდა - ეჭვები გაჩნდა იმის შესახებ, რაც ტრანსატლანტიკური განხეთქილების ახალ ფაზას ჰგავდა: დაშოშმინების დროებითი მცდელობა, ფუნდამენტურ უთანხმოებებში ყოველგვარი რეალური ცვლილების გარეშე“, - ნათქვამია სტატიაში.

კონფერენციის პრეზიდენტს, ვოლფგანგ იშინგერს სხვა არაფერი დარჩენოდა, გარდა იმისა, რომ რუბიოს გამოსვლის შემდეგ ეს „შვების ამოსუნთქვა“ ეღიარებინა, რადგან მისი ტონი ნაკლებად მუქარისშემცველი იყო, ვიდრე ვიცე-პრეზიდენტ ჯეი დი ვენსისა.

2025 წელს, იმავე დარბაზში, ვენსმა საფუძველი ჩაუყარა განხეთქილებას ევროპასა და ტრამპის ეპოქის ამერიკას შორის. ევროკომისიის პრეზიდენტმა, ურსულა ფონ დერ ლაიენმა განაცხადა, რომ ის „ძალიან დამშვიდებულია“, თუმცა აქვე აღნიშნა, რომ აშშ-ის ადმინისტრაციის სხვა წარმომადგენლები გაცილებით მკაცრ პოზიციას იკავებენ.

მთავარი განსხვავება კი ნამდვილად ტონი იყო. რუბიოს გზავნილი, ფაქტობრივად, ორი ნაწილისგან შედგებოდა. პირველმა ნაწილმა, რომელმაც აუდიტორია „დაამშვიდა“, დაადასტურა ისტორიითა და კულტურული მემკვიდრეობით ჩამოყალიბებული ტრანსატლანტიკური კავშირის უწყვეტობა. აშშ-ის სახელმწიფო მდივანმა განმანათლებლობის ნაცვლად გერმანული ლუდის, ბეთჰოვენისა და „ბითლზის“ ხსენება ამჯობინა, თუმცა მან თქვა ის, რისი მოსმენაც შეკრებილებს სურდათ: „იმ დროს, როდესაც სათაურები ტრანსატლანტიკური ეპოქის დასასრულს გვამცნობენ, დაე ყველასთვის ცნობილი და ნათელი იყოს, რომ ეს არც ჩვენი მიზანია და არც ჩვენი სურვილი [...] ჩვენ ყოველთვის ევროპის შვილებად დავრჩებით“.

გზავნილის მეორე ნაწილი კი, მესიანისტური ელფერით, სრულად ასახავდა MAGA-ს იდეოლოგიას. მან ჩამოთვალა ევროპის სატკივარი - „კლიმატის კულტიდან“ დაწყებული „მასობრივი მიგრაციით“ დასრულებული - რასაც თან ახლდა ქრისტიანობის ხაზგასმული ქება და მოწოდება ევროპელებისადმი, შეერთებოდნენ პრეზიდენტ დონალდ ტრამპის ძალისხმევას „დასავლური ცივილიზაციის“ აღსადგენად“.

დამსწრე ევროპელი ლიდერების უმეტესობამ არჩია ყურადღება გზავნილის პოზიტიურ ასპექტებზე გაემახვილებინა და აღნიშნა, რომ ამერიკელმა მაღალჩინოსანმა თავი აარიდა ტრამპის მუქარების გამეორებას გრენლანდიასა და ტარიფებთან დაკავშირებით.

არიან ისინი გულუბრყვილოები? დადგა „ლაჩრული შვების“ ის საშინელი მომენტი? ბევრი სწორედ ამას შიშობდა კონფერენციის კულუარებში გამართული არაფორმალური დისკუსიების დროს. არაერთხელ ახსენეს ძალადობის მსხვერპლი ცოლის მეტაფორა, რომელსაც სურს დაიჯეროს, რომ ქმარი შეიცვალა მხოლოდ იმიტომ, რომ მან რამდენიმე დღით შეწყვიტა მისი ცემა.

„ვშიშობ, საკუთარ თავს ვიტყუებთ“, - განაცხადა კლაუდია მაიორმა, გერმანიის მარშალის ფონდის გავლენიანმა ექსპერტმა. „შინაარსობრივად, რუბიოს გზავნილი იგივეა, რაც ვენსის: ჩვენ შეგვიძლია ვითანამშრომლოთ, მაგრამ მხოლოდ ჩვენი პირობებით. და რადგან ევროპელების სტრატეგიაა, აშშ პროცესებში ჩართული დატოვონ, ჩვენ თავს მოვიკატუნებთ, თითქოს ამის გვჯერა“. ტონი შეიცვალა და არა არსი - დაადასტურა ფინეთის პრეზიდენტმა, ალექსანდრე სტუბმა.

„ეს ფხიზელი ხედვა მით უფრო აუცილებელი იყო, თუ გავითვალისწინებთ, რომ რუბიოს არ დაუზუსტებია ტრამპის პოზიცია რუსეთთან დაკავშირებით და თავის გამოსვლაში უკრაინაც კი არ უხსენებია. მიუნხენის შემდეგ რუბიო სლოვაკეთსა და უნგრეთში გაემგზავრა MAGA-ს იდეოლოგიისადმი უფრო სიმპათიით განწყობილი პარტნიორების მხარდასაჭერად, რომლებიც უფრო მეტ წინააღმდეგობას უწევენ ევროპულ ღირებულებებს. მიუნხენში მყოფ სხვა ამერიკელ მომხსენებლებს, განსაკუთრებით სამხრეთ კაროლინელ „რესპუბლიკელ“ სენატორ ლინდსი გრემს - ტრამპის ახლო მოკავშირეს - თავიანთი განზრახვების დამალვა არც კი უცდიათ. „ვის ადარდებს საერთოდ, ვის ეკუთვნის გრენლანდია? მე - არა!“ - წამოიძახა გრემმა. „მთავარი ისაა, რომ გრენლანდია უფრო მეტად გამაგრდება, რადგან დონალდ ტრამპი, როგორც კი იგრძნობს, რომ ეს მისი „ბრენდია“ ან მასში წილი აქვს, მასშტაბურ ნაბიჯებს გადადგამს“, - წერს სტატიის ავტორი.