AXIOS: აშშ-ის შეიარაღებული ძალების მეთაურთა გაერთიანებული კომიტეტის ხელმძღვანელი ტრამპსა და მაღალჩინოსნებს აფრთხილებს, რომ ირანის წინააღმდეგ სამხედრო კამპანიამ შესაძლოა სერიოზული რისკები წარმოშვას

აშშ-ის შეიარაღებული ძალების მეთაურთა გაერთიანებული კომიტეტის ხელმძღვანელი, გენერალი დენ კეინი პრეზიდენტ ტრამპსა და მაღალჩინოსნებს აფრთხილებს, რომ ირანის წინააღმდეგ სამხედრო კამპანიამ შესაძლოა სერიოზული რისკები წარმოშვას - კერძოდ, ხანგრძლივ კონფლიქტში ჩათრევის საფრთხე. ინფორმაციას ამის შესახებ გამოცემა AXIOS-ი ინფორმირებულ წყაროებზე დაყრდნობით ავრცელებს.

ტრამპის ადმინისტრაციის მაღალ ეშელონებში მიმდინარეობს დებატები იმის შესახებ, თუ როგორ მართონ ირანთან არსებული დაპირისპირება და რა შედეგები მოჰყვება თითოეულ არჩევანს. ამ მომენტისთვის, ტრამპის გარემოცვაში რამდენიმე ფიგურა სიფრთხილისკენ მოუწოდებს, თუმცა ზოგიერთი წყაროს ვარაუდით, თავად ტრამპი სამხედრო დარტყმისკენ იხრება.

უპირველეს ყოვლისა, დგას საკითხი იმის შესახებ, თუ როგორი იქნება წარმატება სამხედრო მოქმედების შემთხვევაში და რამდენად სარისკო იქნება მისი მიღწევის მცდელობა. მეორე მხრივ, ბირთვული შეთანხმების მიღწევა, სავარაუდოდ, პრეზიდენტის მიერ მანამდე დაწესებული ზოგიერთი „წითელი ხაზიდან“ უკან დახევას ნიშნავს. სანამ ტრამპი მსჯელობს იმაზე, დაესხას თუ არა თავს ირანს და რა ფორმით, მისი წარმომადგენლები - ჯარედ კუშნერი და სტივ უიტკოფი - პრეზიდენტს მოუწოდებენ, თავი შეიკავოს და დიპლომატიას შანსი მისცეს.

ინფორმაცია იმის შესახებ, თუ რა პოზიცია უჭირავთ ტრამპის გუნდის წამყვან წევრებს, ეყრდნობა ხუთ წყაროსთან საუბარს, რომლებიც პირადად ესწრებოდნენ მაღალი დონის შეხვედრებს ან ფლობენ დეტალურ ინფორმაციას მათ შესახებ.

კეინის პოზიცია შესაძლოა განსაკუთრებით გავლენიანი აღმოჩნდეს, რადგან ის ტრამპის მთავარი სამხედრო მრჩეველია და პრეზიდენტის მხრიდან დიდი ნდობით სარგებლობს. წყაროების თქმით, არავინ უჭერს მხარს შეჭრას ან სახმელეთო ოპერაციას.

აშშ-ის ოფიციალური პირის განცხადებით, ტრამპმა უფლებამოსილება მიანიჭა ანალიტიკოსთა მცირე ჯგუფს, რათა მათ ირანთან დაკავშირებული პრობლემები დაამუშაონ და პრეზიდენტს წარუდგინონ სხვადასხვა ვარიანტი, რომელთა გამოყენებასაც ის მისთვის სასურველ დროს შეძლებს - ისე, რომ მაქსიმალურად გაზარდოს გავლენა და მინიმუმამდე დაიყვანოს რისკი.

ორი წყაროს ინფორმაციით, მაშინ როდესაც კეინი სრულად უჭერდა მხარს ვენესუელის ოპერაციას, ირანთან დაკავშირებულ დისკუსიებში ის ბევრად ფრთხილია.

ერთ-ერთი წყაროს განცხადებით, კეინი არ გამოდის სამხედრო დარტყმის ინიციატივით, თუმცა ის მხარს დაუჭერს და აღასრულებს ტრამპის ნებისმიერ გადაწყვეტილებას. მეორე წყარო, რომელიც უშუალოდ იცნობს კეინის პოზიციას, აცხადებს, რომ თავმჯდომარე სკეპტიკურად კი არ არის განწყობილი სამხედრო კამპანიის მიმართ, არამედ „ფხიზლად და რეალისტურად“ აფასებს წარმატების შანსებსა და იმას, თუ რა შეიძლება მოჰყვეს ომის დაწყებას.

ვიცე-პრეზიდენტმა ვენსმა ბოლო დღეების შიდა განხილვების დროს ასევე გამოთქვა შეშფოთება კონფლიქტში შესაძლო ჩათრევის თაობაზე. ერთ-ერთმა წყარომ დაადასტურა, რომ ვიცე-პრეზიდენტი სამხედრო და ეროვნული უსაფრთხოების ოფიციალურ პირებთან ოპერაციის რისკებისა და სირთულის შესახებ კითხვებს სვამდა, თუმცა უარყო, რომ ის ირანზე დარტყმის კატეგორიული წინააღმდეგია.

ვენსს იმედი აქვს, რომ ხუთშაბათს ჟენევაში დაგეგმილი მოლაპარაკებები დიპლომატიურ გარღვევას გამოიღებს, თუმცა შეთანხმების მიღწევის შანსების მიმართ ოპტიმისტურად განწყობილი არ არის - ამ პოზიციას ბევრი სხვა მაღალჩინოსანიც იზიარებს.

ორი წყაროს ინფორმაციით, სახელმწიფო მდივან მარკო რუბიოს „ნეიტრალური პოზიცია“ უჭირავს და არც დარტყმის მომხრედ გამოდის და არც მის წინააღმდეგ.