The New York Times-მა დაადასტურა ირანში 22 სკოლისა და 17 სამედიცინო დაწესებულების დაზიანება

იმ ფონზე, როდესაც მყიფე ზავი ძალაში შედის, ირანი აშშ-ისა და ისრაელის დარტყმების შედეგად მიყენებულ ზარალს აფასებს, რომელმაც ქვეყნის სამოქალაქო ინფრასტრუქტურას მძიმე დაღი დაასვა. The New York Times-მა დაადასტურა 22 სკოლისა და 17 სამედიცინო დაწესებულების დაზიანება, რაც ომის განმავლობაში მიყენებული საერთო ნგრევის მხოლოდ მცირე ნაწილია.

ნგრევის მასშტაბები, სავარაუდოდ, გაცილებით დიდია, ვიდრე ეს The Times-ის ანალიზშია ასახული. ირანის „წითელი ნახევარმთვარის“ საზოგადოებამ - ქვეყნის მთავარმა ჰუმანიტარულმა ორგანიზაციამ - 2 აპრილს განაცხადა, რომ ომის დროს, სულ მცირე, 763 სკოლა და 316 სამედიცინო დაწესებულება დაზიანდა ან განადგურდა.

The Times-მა დაზიანებები მაღალი გარჩევადობის თანამგზავრული ფოტოების გამოყენებით და სახელმწიფო მედიისა თუ სოციალური ქსელების ვიდეომასალების გადამოწმებით დაადასტურა. ანალიზი შემოიფარგლა მხოლოდ იმ სკოლებითა და სამედიცინო დაწესებულებებით, რომლებიც 28 თებერვალს - ომის პირველ დღეს - ან მის შემდეგ დაზიანდა.

The Times-ის ანალიზი აჩვენებს, რომ დაზიანებები ხშირად მჭიდროდ დასახლებულ უბნებზე მიტანილმა დარტყმებმა გამოიწვია - განსაკუთრებით თეირანში, რომელიც ისეთივე მჭიდროდ არის დასახლებული, როგორც ნიუ-იორკი.

The Times-მა ვერ შეძლო სკოლებსა და სამედიცინო დაწესებულებებში დაღუპულთა საერთო რაოდენობის დადასტურება. უფლებადამცველთა საინფორმაციო სააგენტოს (HRANA) მონაცემებით, სამშაბათის მდგომარეობით, ირანში, სულ მცირე, 1 701 სამოქალაქო პირია მოკლული. მათ შორის არიან სტუდენტები, მასწავლებლები და სამედიცინო სფეროს მუშაკები.

The Times-ის მიერ შესწავლილ შემთხვევათა უმრავლესობაში, დარტყმის მიზანმიმართული სამიზნე გაურკვეველი იყო. ზოგჯერ სკოლები და სამედიცინო დაწესებულებები ახლომდებარე დარტყმების შედეგად ზიანდებოდა, სხვები კი პირდაპირი თავდასხმის ობიექტი გახდა. ყოველთვის არ იყო შესაძლებელი იმის დადგენა, დარტყმები აშშ-ის სამხედრო ძალების მიერ იყო განხორციელებული თუ ისრაელის.