მაიკ პენსი: ტრამპის ზეწოლის შედეგად, ფხენიანმა სეულთან მოლაპარაკებები დაიწყო

აშშ-ის ვიცეპრეზიდენტი მაიკ პენსი ფიქრობს, რომ სამხრეთ და ჩრდილოეთ კორეას შორის მოლაპარაკებების დაწყებაზე დიდი გავლენა ტრამპის ზეწოლის პოლიტიკამ იქონია. 

პენსის განცხადებით, ფხენიანის ხელისუფლება აშშ-ის დიპლომატიური და ეკონომიკური ზეწოლის გამო დათანხმდა სეულთან მოლაპარაკებებს. 

"პრეზიდენტმა ტრამპმა ჩრდილოეთ კორეაზე უპრეცედენტო ეკონომიკური და დიპლომატიური ზეწოლა მოახდინა. ვფიქრობ, ოლიმპიადასთან დაკავშირებით დაწყებული მოლაპარაკებები არის პირდაპირი შედეგი იმ ზეწოლისა, რომელიც პრეზიდენტმა ტრამპმა განახორციელა ჩრდილოეთ კორეაზე", - განაცხადა მაიკ პენსმა.

მინისტრების დონეზე ჩრდილოეთ კორეამ და სამხრეთ კორეამ მოლაპარაკებები დღეს დაიწყეს. შეხვედრის მთავარი საკითხი ზამთრის ოლიმპიურ თამაშებში ჩრდილოეთ კორეის მონაწილეობა და ორმხრივი ურთიერთობის სტატუსი იქნება. შეთანხმების მიღწევის შემთხვევაში, ორივე მხარე საერთაშორისო ოლიმპიურ კომიტეტთან გამართავს მოლაპარაკებას.

ჩრდილოეთ და სამხრეთ კორეის უმაღლესი დონის შეხვედრა ბოლოს 2015 წლის დეკემბერში გაიმართა. 

სამხრეთ კორეამ ფხენიანს მაღალი დონის შეხვედრის გამართვა 2 იანვარს შესთავაზა. მანამდე, სამხრეთ კორეის პრეზიდენტი მუნ ჩე ინი მიესალმა კიმ ჩენ ინის განცხადებას, რომ ჩრდილოეთ კორეას 2018 წლის ზამთრის ოლიმპიურ თამაშებში მონაწილეობა სურს. 

3 იანვარს, ჩრდილოეთ კორეის ლიდერმა, კიმ ჩენ ინმა გასცა განკარგულება სამხრეთ კორეასთან მოლაპარაკებების დაწყების შესახებ.