CNN: ამერიკელი სამხედროები ჰორმუზის სრუტის დაცვის სისტემის დაბომბვის გეგმას ამუშავებენ

ამერიკელი სამხედროები ჰორმუზის სრუტეში არსებული ირანის შესაძლებლობების დაბომბვის გეგმას ამუშავებენ, თუ ისლამურ რესპუბლიკასთან მოქმედი ცეცხლის შეწყვეტის რეჟიმი ჩავარდება და ომი განახლდება. ინფორმაციას CNN-ი რამდენიმე წყაროზე დაყრდნობით ავრცელებს.

ამერიკული ტელეარხის ცნობით, პენტაგონი სამხედრო ოპერაციის რამდენიმე ვარიანტს განიხილავს. ერთ-ერთი ვერსიის თანახმად, ამერიკელები ჰორმუზის სრუტის, არაბეთის ყურის და ომანის ყურის დაბომბვას აპირებენ. გარდა ამისა, მიზანში, შესაძლოა, ამოიღონ მცირე ზომის ნავები და ნაღმოსანი გეგმები - ყველაფერი, რამაც ირანს მნიშვნელოვანი საზღვაო არტერიის გადაკეტვის საშუალება მისცა.

ჰორმუზის სრუტის დაკეტვამ გლობალურ ეკონომიკაში მასშტაბური რყევები გამოიწვია და აშშ-ის პრეზიდენტის, დონალდ ტრამპის ძალისხმევას, ინფლაციის შემცირებასთან დაკავშირებით, ძირი გამოუთხარა. მიუხედავად იმისა, რომ 7 აპრილიდან ზავია გამოცხადებული, სრუტე დაკეტილი რჩება.

ომის დროს, რომელიც დაახლოებით ერთი თვე გრძელდებოდა, აშშ ირანის სიღრმეში მდებარე სამიზნეების განადგურებით იყო დაკავებული. ახალი გეგმა აშშ-ის სამხედრო ძალის კონცენტრირებას ჰორმუზის სრუტის გარშემო მოახდენს.

მანამდე CNN-ი წერდა, რომ ირანის რაკეტსაწინააღმდეგო კომპლექსების უმეტესობა დაუზიანებელია. ისლამურ რესპუბლიკას აგრეთვე მცირე ზომის ნავები აქვს, რომლითაც მას გემებზე თავდასხმის განხორციელება შეუძლია, რაც აშშ-ის ამოცანებს ართულებს.