მეცოლა ალიევს: ჩვენ არასდროს შევცვლით მუშაობის მეთოდებს

ერევანში გამართულ ევროპული პოლიტიკური გაერთიანების სამიტზე, სადაც ევროკავშირის, მეზობელი და პარტნიორი ქვეყნების ლიდერები შეიკრიბნენ, ილჰამ ალიევსა და რობერტა მეცოლას შორის მწვავე სიტყვიერი შელაპარაკება მოხდა, - წერს Euronews-ი.

აზერბაიჯანის პრეზიდენტმა ევროპარლამენტი, რომელსაც მეცოლა ხელმძღვანელობს, ბაქოს შესახებ „ცილისწამებისა და სიცრუის გავრცელებაში“ დაადანაშაულა.

მეცოლამ, თავის მხრივ, სიტყვა ითხოვა და მკვეთრად უარყო ეს ბრალდებები. „ჩვენ არასდროს შევცვლით მუშაობის მეთოდებს, მაშინაც კი, თუ ეს ვინმესთვის დისკომფორტის შემქმნელი იქნება“, - განაცხადა მან.

ალიევმა ასევე აღნიშნა, რომ ევროპარლამენტარები ცდილობენ „საბოტაჟი მოუწყონ სამშვიდობო პროცესს“, რომელიც გასულ წელს აშშ-ის შუამავლობით დაიწყო და მთიან ყარაბაღში კონფლიქტის შემდეგ სომხეთსა და აზერბაიჯანს შორის ურთიერთობების დიპლომატიური და ეკონომიკური ჩარჩოები დაადგინა.

ალიევმა დასძინა, რომ ევროპარლამენტმა აზერბაიჯანის კრიტიკით 14 რეზოლუცია მიიღო და ამას ქვეყნით „ერთგვარი აკვიატება“ უწოდა.

მან ასევე დაადასტურა, რომ აზერბაიჯანის პარლამენტი ევროპარლამენტთან თანამშრომლობას ყველა მიმართულებით შეაჩერებს.
ევროდეპუტატების მუშაობის კრიტიკის პარალელურად, ის მიესალმა ევროკომისიის ძალისხმევას ბრიუსელისა და ბაქოს - ნავთობისა და გაზის მსხვილი ექსპორტიორის - ურთიერთობების გაძლიერებისა და, ზოგადად, სამხრეთ კავკასიასთან თანამშრომლობის გაფართოების კუთხით.

მეცოლამ პარლამენტის დასაცავად საპასუხო არგუმენტები მოიყვანა.

„ევროპარლამენტი არის დემოკრატიული ორგანო, რომელიც პირდაპირი კენჭისყრით აირჩევა და მისი რეზოლუციები ხმათა უმრავლესობით მიიღება“, - განაცხადა მან. „ჩვენ გვესმის, რომ შედეგები ზოგიერთისთვის შეიძლება არასასიამოვნო იყოს, მაგრამ ჩვენ არასდროს შევცვლით ჩვენი მუშაობის პრინციპს“.