პოლონეთის საგარეო საქმეთა მინისტრის განცხადებით, ვარშავა მზად არის ფიცოს მოსკოვისკენ საჰაერო გზა გაუხსნას, თუ სლოვაკეთი უკრაინის დახმარებას განბლოკავს

პოლონეთის საგარეო საქმეთა მინისტრმა, რადოსლავ სიკორსკიმ განაცხადა, რომ ოფიციალური ვარშავა მზად არის სლოვაკეთის პრემიერ-მინისტრის, რობერტ ფიცოს თვითმფრინავს საჰაერო სივრცე გაუხსნას, რათა ის 9 მაისს მოსკოვში ჩავიდეს, თუ ოფიციალური ბრატისლავა უკრაინისთვის განკუთვნილ დახმარებას აღარ დაბლოკავს.

„შევძლებთ ვაპატიოთ სლოვაკ პრემიერს, რობერტ ფიცოს რუსეთში ვიზიტი, თუ ის უკრაინის დახმარებას აღარ დაბლოკავს“, - ციტირებს პოლონური მედია სიკორსკის.

მან ასევე დასძინა, რომ სლოვაკეთისა და უკრაინის ურთიერთობაში ახალ პოზიტიურ ნიშნებს ხედავს და იმედი გამოთქვა, რომ ეს გახდება „ვიშეგრადის ოთხეულის“ ახალი ეტაპის დასაწყისი.

ცნობისთვის, ფიცო 9 მაისს მოსკოვში ჩასვლას გეგმავს. ის რუსეთის პრეზიდენტთან, ვლადიმერ პუტინთან შეხვედრას აპირებს. მანამდე ვრცელდებოდა ინფორმაცია, რომ სლოვაკეთის პრემიერი მეორე მსოფლიო ომში გამარჯვების 81-ე წლისთავისადმი მიძღვნილ აღლუმსაც დაესწრება, თუმცა მოგვიანებით თავად ფიცომ ეს ინფორმაცია უარყო.