ევროკომისიამ წარადგინა გეგმა, რომელიც სიღარიბის დაძლევას და საბინაო კრიზისის მოგვარებას 2050 წლისთვის ითვალისწინებს

ევროკომისიამ წარადგინა სოციალური გეგმა, რომლის მიზანს სიღარიბის დაძლევა და შშმ პირების უფლებების დაცვა წარმოადგენს.

ევროკომისიის მონაცემებით, სიღარიბე ევროკავშირის ყოველ მეხუთე მცხოვრებს და ყოველ მეოთხე ბავშვს ემუქრება.

გარდა ამისა, როგორც გეგმიდან ირკვევა, ევროკავშირის მცხოვრებლების 40% საკუთარი საცხოვრებელი სახლის არარსებობას უჩივის, ხოლო 1 მილიონი ადამიანი უსახლკაროდ ითვლება.

ევროკომისიის მონაცემებით, 93 მილიონი ადამიანი ფინანსურ სირთულეებს განიცდის, განსაკუთრებით დაუცველები არიან მარტოხელა დედები და მამები, ასევე, 16-დან 29 წლამდე ასაკის ახალგაზრდები.

მოსალოდნელია, რომ სიტუაცია კიდევ უფრო გაუარესდება.

„სიღარიბე და სოციალური იზოლაცია - ეს არის გამოწვევები, რომლებსაც უნდა გავუმკლავდეთ. დღეს ჩვენ სიღარიბის შემცირების სტრატეგიას წარვადგენთ. ვდგამთ გაბედულ ნაბიჯებს, ვაძლიერებთ რა გარანტიებს ბავშვებისთვის, უსახლკაროების პრობლემის პროფილაქტიკას ვაუმჯობესებთ და შეზღუდული შესაძლებლობების მქონე პირების სრულ ინტეგრაციას ვახდენთ. ღირსება, შესაძლებლობები და თანასწორობა - ეს არის საკვანძო ღირებულებები ევროპისა, რომელსაც ჩვენ ვაშენებთ“, - აღნიშნა ევროკომისიის პრეზიდენტმა ურსულა ფონ დერ ლაიენმა სტრატეგიის წარდგენისას.

სტრატეგიის თანახმად, 2030 წლისთვის სიღარიბის რისკის ზონაში მყოფი ადამიანების შემცირება 15 მილიონით უნდა მოხდეს, ხოლო 2050 წლისთვის აღნიშნული პრობლემა სრულად უნდა მოგვარდეს.