CNN: ტრამპის ვიზიტი ჩინეთში არის ისტორიული შესაძლებლობა ორი უმსხვილესი ეკონომიკისთვის, გადაიაზროს სავაჭრო ურთიერთობები და პაექრობის ტონი

აშშ-ის პრეზიდენტის დონალდ ტრამპის ვიზიტს ჩინეთში დიდი მნიშვნელობა აქვს, ეს არის ისტორიული შესაძლებლობა მსოფლიოს ორი უმსხვილესი ეკონომიკისთვის, გადახედონ სავაჭრო ურთიერთობებს და პაექრობის ტონს. ანალიტიკურ სტატიას ამ შინაარსით CNN-ი აქვეყნებს.

როგორც CNN-ი წერს, აღნიშნული მიზნის მისაღწევად ტრამპს და ჩინეთის ლიდერს სი ძინპინს მოუწევთ გადალახონ უთანხმოებები ისეთ სფეროებში, როგორიცაა ტექნოლოგიები, ვაჭრობა, კრიტიკულად მნიშვნელოვანი წიაღისეული და ტაივანი.

აღსანიშნავია, რომ ეს არის ტრამპის პირველი ვიზიტი ჩინეთში 2017 წლის შემდეგ, როცა ის ამერიკის პრეზიდენტი პირველი ვადით იყო.

„ტრამპი და სი ახლა გახლეჩილი გეოპოლიტიკური ლანდშაფტის სხვადასხვა მხარეს სხედან, განსაკუთრებით იმის გათვალისწინებით, რომ ჩინეთის უახლოესი პარტნიორი, ირანი გააფთრებული ეწინააღმდეგება ვაშინგტონს ომის დასრულების საკითხში“, - აღნიშნულია სტატიაში.

CNN-ის თანახმად, შეიცვალა ჩინეთიც - მან ტრამპის ტექნოლოგიური ომის პირველი ფაზა წარმატებით გადალახა, საკუთარი საექსპორტო გიგანტის მოდერნიზება მოახდინა და თვითკმარი მაღალტექნოლოგიური ზესახელმწიფო გახდა.

როგორც CNN-ი აღნიშნავს, ტრამპს მოუწევს შეხვდეს თავის ჩინელ კოლეგას, რომელმაც ძალაუფლება გაიმყარა, მმართველობის ვადა გაიხანგრძლივა. ამის პარალელურად, სი ძინპინს მოუწევს ესაუბროს ლიდერს, რომელმაც აშშ-ის საგარეო პოლიტიკის მასშტაბური გარდაქმნა მოახდინა.

„ორი ლიდერის ურთიერთობის დინამიკაზე იქნება დამოკიდებული არა მხოლოდ აღიარებული და აღმავალი სუპერსახელმწიფოების ურთიერთობების ბედი, არამედ მთელი საერთაშორისო სისტემის მომავალი, რომელიც მათთან მჭიდროდ არის დაკავშირებული“, - აღნიშნულია სტატიაში.