ტრამპმა დიდ ბრიტანეთში ვიზიტი გააუქმა

აშშ-ის პრეზიდენტმა დონალდ ტრამპმა გაურკვეველი დროით გადადო დიდ ბრიტანეთში ვიზიტი, რომელიც მიმდინარე წლის თებერვალში უნდა შემდგარიყო. ვიზიტი აშშ-ის საელჩოს ახალი შენობის გახსნის ცერემონიას ემთხვეოდა. ამის შესახებ BBC საკუთარ წყაროზე დაყრდნობით იუწყება. ტრამპის ნაცვლად, ლონდონში აშშ-ის სახელმწიფო მდივანი რექს ტილერსონი ჩავა. 

მანამდე, ვრცელდებოდა ინფორმაცია, რომ პრეზიდენტის ვიზიტი 26-27 თებერვალს გაიმართებოდა. 

ბრიტანეთის მთავრობაში ამ საკითხზე ჯერჯერობით ოფიციალური განცხადება არ გაკეთებულა. სამთავრობო წყაროების ცნობით, ერთი ვერსიით, ტრამპმა ვიზიტზე უარი იმის გამო თქვა, რომ დავოსის ეკონომიკური ფორუმის შემდეგ, რომელიც 23-26 იანვარს გაიმართება, ასეთ მოკლე პერიოდში ისევ ევროპაში ვიზიტი არ ისურვა. მეორე ვერსიით, კი მან ბრიტანეთში მისი ვიზიტის გამო მოსალოდნელ საპროტესტო აქციებს თავი აარიდა. 

თავად ტრამპმა Twitter-ზე დაადასტურა, რომ ლონდონში ვიზიტი გააუქმა. ამის მიზეზად ობამას ადმინისტრაციის გადაწყვეტილებაზე თავისი უარყოფითი დამოკიდებულება დაასახელა, რომელიც აშშ-ის საელჩოს ძველი შენობის გასხვისებას და ახალი შენობის აშენებას ეხება. 

"მე ლონდონში ვიზიტი გავაუქმე, რადგან არ ვარ ობამას ადმინისტრაციის დიდი მოყვარული, რომელმაც ძალიან იაფად გაასხვისა ბრიტანეთში აშშ-ის საელჩოს შენობა. სანაცვლოდ კი, გარეუბანში 1,2 მილიარდ დოლარად ახალი ააშენა. ცუდი გარიგებაა. უნდოდათ, რომ მე ლენტა გამეჭრა. არა!"- დაწერა ტრამპმა.

Reason I canceled my trip to London is that I am not a big fan of the Obama Administration having sold perhaps the best located and finest embassy in London for “peanuts,” only to build a new one in an off location for 1.2 billion dollars. Bad deal. Wanted me to cut ribbon-NO!

— Donald J. Trump (@realDonaldTrump) 12 January 2018

რამდენიმე თვის წინ ტრამპის გაერთიანებულ სამეფოში ვიზიტის წინააღმდეგ პეტიციას ორმა მილიონმა ადამიანმა მოაწერა ხელი. მიზეზი შეერთებული შტატების პრეზიდენტის მიერ საიმიგრაციო პოლიტიკის გამკაცრების განკარგულებაა.

ლონდონში ტრამპის ჩასვლის წინააღმდეგია დედაქალაქის მერი სადიკ ხანიც.

დონალდ ტრამპის ინაუგურაციის შემდეგ, დიდი ბრიტანეთის პრემიერმინისტრი ტერეზა მეი ერთ-ერთი პირველი იყო, ვინც ვაშინგტონში ჩავიდა და პრეზიდენტი დიდ ბრიტანეთში ოფიციალურად მიიწვია.