POLITICO: პარტია „სუვერენული ერების ევროპა“ შესაძლოა კანონგარეშედ გამოცხადდეს ევროკავშირის ღირებულებებთან შეუსაბამობის გამო

პარტია „სუვერენული ერების ევროპა“ (ESN), რომლის წევრიც არის „ალტერნატივა გერმანიისთვის“ (AfD), შესაძლოა კანონგარეშედ გამოცხადდეს ევროკავშირის ღირებულებებთან შეუსაბამობის გამო, - წერს გამოცემა POLITICO.

სამეთვალყურეო ორგანომ, რომელიც ევროპულ პოლიტიკურ პარტიებს ზედამხედველობს, ოთხშაბათს აამოქმედა პროცედურა, რომლის შედეგადაც „სუვერენული ერების ევროპას“ შესაძლოა ჩამოერთვას პოლიტიკური პარტიის სტატუსი და დაკარგოს დაფინანსება.

პარტია „სუვერენული ერების ევროპა“ ცალკე იურიდიული პირია და განსხვავდება ევროპარლამენტში არსებული ამავე სახელწოდების პოლიტიკური ჯგუფისგან, რომელიც 27 ევროპარლამენტარს აერთიანებს. პოლიტიკური ჯგუფები საპარლამენტო ფრაქციებს წარმოადგენენ, ხოლო პარტიები - ეროვნული პარტიების უფრო ფართო ალიანსებს, რომლებიც ევროკავშირის ბიუჯეტიდან ფინანსდებიან.

ESN-ის პოლიტიკურ ჯგუფს სანქციები არ ემუქრება. ერთადერთი, რასაც „ალტერნატივა გერმანიისთვის“ ევროპარლამენტარები იგრძნობენ, იქნება პოლიტიკური პარტიის არარსებობა, რომელიც მათ მომავალ ევროპარლამენტის არჩევნებში მხარს დაუჭერდა ან თანამომხრე ფრაქციებთან პოლიტიკის კოორდინაციაში დაეხმარებოდა.

პარტია ESN-ი და ESN-ის ჯგუფი „ალტერნატივა გერმანიისთვის“ მიერ დაფუძნდა 2024 წლის ევროპარლამენტის არჩევნების კვალდაკვალ. მათ შემადგენლობაში შედიან: ბულგარეთის „აღორძინება“, საფრანგეთის „რეკონკისტა“, პოლონეთის „კონფედერაცია“, ჩეხეთის „თავისუფლება და პირდაპირი დემოკრატია“, უნგრეთის „ჩვენი სამშობლო“, ნიდერლანდების „ფორუმი დემოკრატიისთვის“ და სლოვაკეთის მოძრაობა „რესპუბლიკა“. 2026 წლისთვის პარტიამ ევროპარლამენტისგან სუბსიდიების სახით 2 მილიონ ევროზე მეტი უნდა მიიღოს.

ევროპული პოლიტიკური პარტიებისა და ფონდების მარეგულირებელმა სააგენტომ (APPF) განაცხადა, რომ აღმოაჩინა მტკიცებულებები, რომლებიც „ეჭვქვეშ აყენებს ESN-ის პარტიის შესაბამისობას“ ევროკავშირის ღირებულებებთან. ამის შესახებ უწყების დირექტორმა, პასკალ შონარდმა ოფიციალურ წერილში აღნიშნა. წერილი, რომელიც POLITICO-მ მოიპოვა, ევროკავშირის საბჭოს მისამართითაა გაგზავნილი, რომელიც წევრი ქვეყნების მთავრობების წარმომადგენლებს აერთიანებს.

სამეთვალყურეო ორგანო აკონტროლებს, რამდენად შეესაბამებიან პოლიტიკური პარტიები და ფონდები მათ მარეგულირებელ ევროკავშირის წესებს. ეს წესები პარტიებისგან მოითხოვს კავშირის ფუნდამენტური ღირებულებების დაცვას, მათ შორის „ადამიანის ღირსების, თავისუფლების, დემოკრატიის, თანასწორობის, კანონის უზენაესობისა და ადამიანის უფლებების, მათ შორის უმცირესობათა უფლებების პატივისცემას“, როგორც ეს განსაზღვრულია ევროკავშირის ხელშეკრულების მე-2 მუხლში.