„მე გთავაზობთ შეხვედრას“ - ზელენსკიმ პუტინს ღია წერილით მიმართა

უკრაინის პრეზიდენტმა, ვოლოდიმირ ზელენსკიმ ვლადიმირ პუტინს ღია წერილი მისწერა. მასში ზელენსკი პუტინს ომის დასრულებისა და ლიდერების დონეზე პირდაპირ მოლაპარაკებებზე გადასვლისკენ მოუწოდებს.

„როდესაც 26 წელზე მეტი ხნის წინ რუსეთში ხელისუფლებაში მოხვედით, უკრაინაში ბევრი ადამიანი თქვენ პოზიტიურად გიყურებდა. ასე იყო. თუმცა ეს უკვე წარსულს ჩაბარდა.

ახლა კი, უკრაინელთა აბსოლუტური უმრავლესობა პოზიტიურად აფასებს იმ ფაქტს, რომ ჩვენი შორ მანძილზე მოქმედი დრონები „ესტუმრნენ“ სანქტ-პეტერბურგში თქვენი ფორუმის გახსნას და 1000 კილომეტრზე მეტი მანძილი დაფარეს. როგორც თქვენთვის კარგადაა ცნობილი, ეს მანძილი ჩვენი შესაძლებლობების ზღვარი არ არის.

თქვენი მმართველობის 26 წელმა სრულიად შეცვალა უკრაინასა და რუსეთს შორის ურთიერთობების დღის წესრიგი. ვაჭრობისა და სხვა სამოქალაქო საკითხების განხილვიდან, ჩვენი ერები გადავიდნენ საუბრებზე, რომლებიც თითქმის ექსკლუზიურად დარტყმებსა და დანაკარგებს ეხება.

რუსეთის სათავეში ყოფნის 26 წლიდან თითქმის ნახევარი თქვენ უკრაინის წინააღმდეგ ომის წარმოებაში გაატარეთ.

რაც არ უნდა თქვათ ნატოზე, გეოპოლიტიკაზე ან რუსულ ენაზე, ეს ომი თქვენი პერსონალური არჩევანია - ომი ყოველგვარი რეალური მიზეზის გარეშე. ისტორიას ის სწორედ ასე ემახსოვრება.

ეს წლები შეიძლებოდა სულ სხვაგვარი ყოფილიყო.

ხშირად გვესმის, რომ ამ ომში თავს კომფორტულად გრძნობთ. რა თქმა უნდა, არა იმ შემთხვევებში, როდესაც საქმე ეხება თქვენი ვალდაის რეზიდენციის ან მოსკოვის აღლუმის უსაფრთხოებას. საკუთარი სიცოცხლე თქვენთვის ძვირფასია.

მაგრამ ახლა ყველანი ვხედავთ, რომ რუსები, საბოლოოდ, ნაკლებად კომფორტულად გრძნობენ თავს ამ რეალობაში - იმ ფაქტთან ერთად, რომ ომს რუსეთისთვის სულ უფრო მეტი ნეგატიური შედეგი მოაქვს.

მათ არ მოსწონთ ჩვენი დრონები და რაკეტები. მათ არ მოსწონთ ბენზინის დეფიციტი და ფასების მუდმივი მატება. მათ არ მოსწონთ მუდმივი შეზღუდვები. მათ არ მოსწონთ თქვენი განზრახვა, დაიწყოთ მობილიზაციის მეორე ტალღა, რათა გააფართოოთ ომი უკრაინაში სხვა მიმართულებით, ან გამოიყენოთ იგი რუსეთის მეზობელი სხვა ქვეყნების წინააღმდეგ.
მათ არ მოსწონთ ის ფაქტი, რომ თქვენს ომს ბოლო არ უჩანს.

დიახ, თქვენ კვლავ შეგიძლიათ აიძულოთ რუსები ამგვარად იარსებონ. თუმცა თქვენი რესურსები საგრძნობლად მცირდება. თქვენ აღარ გექნებათ საკმარისი ფული ან პოლიტიკური კაპიტალი იმისთვის, რომ განაგრძოთ რუსების ლოიალობის ყიდვა ისე, როგორც ამას გასული 26 წლის განმავლობაში აკეთებდით.

ჩვენ კი ყველაფერს გავაკეთებთ, რათა მსოფლიო დაგვეხმაროს ამ მომენტის დაახლოებაში. როგორც თავად გიყვართ თქმა, „ციფრებს უნდა შევხედოთ“.

გუშინ მივიღე მოხსენება მაისის განმავლობაში უკრაინის ფრონტზე თქვენი არმიის დანაკარგების შესახებ, რამაც კიდევ ერთხელ გადააჭარბა 30 000 დაღუპულ და მძიმედ დაჭრილ რუს ჯარისკაცს. ჩვენ ამ დონეს თვიდან თვემდე ვინარჩუნებთ და თითოეული თქვენი დანაკარგის ვიდეოდასტური გვაქვს - ეს არ არის ცარიელი სიტყვები.

ჩვენ ვიცით, რომ ბრძოლის ველზე თქვენი დანაკარგების 63 პროცენტი დაღუპულებზე მოდის, ხოლო მხოლოდ 37 პროცენტია დაჭრილი. 21-ე საუკუნეში ვერცერთი არმია ვერ მისცემს თავს ამგვარი პროპორციის უფლებას. დაღუპულთა წილი კი კვლავაც გაგრძელებს ზრდას.

საქმე ის არ არის, რომ ჩვენ უკრაინაში რუსი ჯარისკაცების ბედი გვაღელვებს მას შემდეგ, რაც თქვენმა ომმა ჩვენს ქვეყანას მოუტანა. მაგრამ მე ვზრუნავ უკრაინელებზე.

ჩვენ ვკარგავთ ჩვენს ხალხს და ყოველი დანაკარგი ჩვენთვის მტკივნეულია. მაშინაც კი, როდესაც უკრაინელთა და რუსების დანაკარგების შეფარდება ერთია ხუთთან ან ერთია ექვსთან, ამას მაინც უდიდესი მნიშვნელობა აქვს.

მნიშვნელობა აქვს იმასაც, რომ თქვენ რეგულარულად, ყოველ რამდენიმე თვეში ერთხელ, გადასწევთ ხოლმე ჩვენი რეგიონების - განსაკუთრებით დონეცკის რეგიონის - აღების ვადებს. და თქვენ მას ვერც ამ წელს აიღებთ.

მაგრამ ჩვენ უკრაინაში არ გვსურს მუდმივი ომი. ჩვენ კარგად ვიცით, რომ ცხოვრება ომის გარეშე უსასრულოდ უკეთესია. და ჩვენ გვინდა ამას მივაღწიოთ. დარწმუნებული ვარ, რუსების უმრავლესობაც პოზიტიურად უპასუხებდა ამას - და თქვენ ეს იცით.

ბევრს არ სჯეროდა, რომ უკრაინა შეძლებდა ასე დიდხანს გაძლებას. თქვენ არ გჯეროდათ. და მათაც არ სჯეროდათ, ვინც რჩევებს გაძლევდათ. ეს შეცდომა იყო.

თქვენ არ ელოდით სრულმასშტაბურ წინააღმდეგობას უკრაინის მხრიდან და ვერ განსაზღვრეთ, რომ საქმე აქამდე მივიდოდა. თუმცა, აი, ყველანი აქ ვართ - ამ სრულმასშტაბური ომის მეხუთე წელს.

ნუ შეგეშინდებათ ამ ომიდან გამოსვლის გზის არჩევა. ეს არის მთავარი, რაც ახლა თქვენგან მოითხოვება. უკრაინამ შეინარჩუნა თავისი დამოუკიდებლობა. და ის მას შეინარჩუნებს. ყველა საწინააღმდეგო პროგნოზის მიუხედავად.

ჩვენ გავაერთიანეთ მრავალი ქვეყანა მსოფლიოში, რათა დადგნენ უკრაინის გვერდით და თქვენს წინააღმდეგ. ჩვენ ვიპოვეთ იარაღი და დაფინანსება, რომელიც გვჭირდებოდა.

ჩვენ ვიღებთ მხარდაჭერას. თქვენ იღებთ სანქციებს. და ეს გაგრძელდება მანამ, სანამ უკრაინისთვის სამართლიანობა არ აღდგება - ის სამართლიანობა, რომელსაც ჩვენ ვეძებთ და რომლის მიღწევაც შესაძლებელია.

ჩვენ არ მივცემთ წარმატების მიღწევის საშუალებას მათ, ვინც ცდილობს დაგარწმუნოთ, რომ რუსეთის წინააღმდეგ სანქციები მნიშვნელოვნად შემსუბუქდება, ხოლო უკრაინის მხარდაჭერა საგრძნობლად შემცირდება თქვენი მხრიდან უკრაინის მიმართ პოზიციის ყოველგვარი არსებითი ცვლილების გარეშე. ორბანის მაგალითი აჩვენებს, თუ როგორ ამთავრებენ სირცხვილით ისინი, ვინც ირჩევს, დაეხმაროს რუსეთს ჩვენს წინააღმდეგ მიმართულ ომში.

უკრაინამ გადაიტანა მკაცრი ზამთრები, როდესაც თქვენ ჩვენი ენერგეტიკული სისტემის განადგურებას ცდილობდით. ჩვენ მყარად ვიდექით - და სიბნელეშიც კი, უკრაინელთა მდგრადობა უცვლელი დარჩა.

ჩვენ ომი თქვენს ტერიტორიაზე გადავიტანეთ და თქვენ ვერ შეძლებდით ამასთან გამკლავებას ჩრდილოეთ კორეის დახმარების გარეშე. თქვენ ხართ რუსეთის პირველი მმართველი, რომელმაც ფხენიანს დახმარებისთვის მიმართა.

დღეს კი თქვენ სრულად ხართ დამოკიდებული ჩინეთზე – ესეც პირველად რუსეთის ისტორიაში.

თქვენ გჯეროდათ, რომ უკრაინელებს არ ეყოფოდათ ძალა თავის დასაცავად. თუმცა დღეს ჩვენი ხალხი ეხმარება პარტნიორებს ახლო აღმოსავლეთსა და ყურის ქვეყნებში საკუთარი თავდაცვის შენებაში.

თქვენ იმედოვნებდით შიდა არეულობას უკრაინაში. ამის ნაცვლად, თქვენმა საკუთარმა სამხედრო ფორმირებებმა მოაწყვეს ამბოხი თქვენს წინააღმდეგ. 23 ივნისს ამ მოვლენის მორიგი წლისთავი იქნება და დუმილი ამ ფაქტს ისტორიიდან ვერ წაშლის.

ახლა კი სწორედ თქვენ ხართ ის, ვისაც თქვენივე ჩინოვნიკები, ბიზნესმენები და პროპაგანდისტები აშკარა დაღლილობით უყურებენ. მსოფლიო ამას ხედავს.

მსოფლიო არ დაღლილა უკრაინით, როგორც თქვენ ამას დიდი ხნის განმავლობაში იმედოვნებდით. თუმცა იზრდება დაღლილობა რუსეთისგან – იმ ფართო მსოფლიოშიც კი, ვინც გეხმარებათ სანქციების გვერდის ავლასა და ეკონომიკის შენარჩუნებაში.

თქვენ არ შეგიძლიათ ეს არ შეამჩნიოთ. ხელისუფლებაში ყოფნის 26 წლის შემდეგ, ასაკი თავისას შვრება. დროთა განმავლობაში კი თქვენ მიმართ დაღლილობა მხოლოდ გაიზრდება.

ჩვენ ვნახეთ დაზვერვის ანგარიშები, რომლებიც აჩვენებს, რომ ახლა განიხილავთ გეგმებს ომის 2027 და 2028 წლებამდე გაგრძელების შესახებ. ჩვენ ასევე ვიცით, რომ გაქვთ იმედი, ბალისტიკური რაკეტები მოგიტანთ იმას, რაც სხვამ ვერაფერმა შეძლო. გსურთ ბელარუსი კიდევ უფრო ღრმად ჩაითრიოთ ამ ომში და ჩვენ ახლა იძულებულნი ვართ, ამისთვისაც მოვემზადოთ. ვხედავთ, რომ ცდილობთ რაღაცის ორკესტრირებას დნესტრისპირეთის გარშემო. თქვენი პროპაგანდისტები, ამა თუ იმ ფორმით, ემუქრებიან რუსეთის მეზობელ ყველა ქვეყანას. მართლა გსურთ ამ ყველაფრის გავლა?

არჩევანი ახლა თქვენზეა. საკმარისია ომი. უკრაინა გთავაზობთ ამ ომის დასრულებას. ეს უნდა გაკეთდეს პატიოსნად, ღირსეულად და იმის გარანტიებით, რომ ომი კვლავ არ გაჩაღდება. ჩვენ ვხედავთ, რომ ამერიკის შეერთებული შტატები სრულად არის ფოკუსირებული ირანის საკითხზე და არასწორი იქნებოდა უბრალოდ ლოდინი, სანამ ევროპაში მიმდინარე ომი კვლავ არ მოექცევა მათი ყურადღების ცენტრში. უკრაინა გთავაზობთ ამ ომის დასრულებას ჩვენსა და თქვენს შორის პირდაპირი ჩართულობით.

მე გთავაზობთ შეხვედრას. ყველამ მოისმინა თქვენი წარმომადგენლების ღიმილიანი ნათქვამი, თითქოს მე შემეძლო მოსკოვში ჩამოსვლა. მაგრამ ამ 26 წლის შემდეგ, უკრაინის ლიდერს თქვენს დედაქალაქში არაფერი ესაქმება - ისევე, როგორც რუსეთის ლიდერს არაფერი ესაქმება კიევში.

არსებობს ქვეყნები, რომლებიც ტრადიციულად მასპინძლობენ ლიდერებს ომისა და მშვიდობის საკითხების გადასაჭრელად. შვეიცარია, თურქეთი, არაბული სამყაროს ქვეყნები - ბევრს შეუძლია და აქვს სურვილი, უმასპინძლოს ასეთ შეხვედრას.

სწორედ ლიდერები წყვეტენ საკვანძო საკითხებს. ასე იყო ყოველთვის და ასე იქნება მომავალშიც. მე გთავაზობთ, განვსაზღვროთ მკაფიო თარიღი ასეთი შეხვედრისთვის.

ჩვენ გვსმენია, რომ ალასკაზე დაგპირდნენ უკრაინისა და ევროპის შესახებ გარკვეული საკითხების გადაჭრას. მაგრამ თავადაც ხედავთ, რომ უკრაინული და ევროპული საკითხები ანკორიჯში არ წყდება.

ვინაიდან ომი ევროპაში მიმდინარეობს და ვინაიდან უკრაინას სჭირდება უსაფრთხოების გარანტიები, ისევე როგორც თქვენ ეძებთ უსაფრთხოების გარანტიებს საკუთარი თავისთვის, ლოგიკური იქნება მათ ჩართვა, ვისაც რეალურად შეუძლია გარანტორად ყოფნა.

ჩვენ გვჯერა, რომ ევროპა უნდა იყოს ამ პროცესის ნაწილი - ისინი, ვისაც ნამდვილად აქვთ სიტუაციაზე გავლენის მოხდენის შესაძლებლობა.

ჩვენ ასევე გვჯერა, რომ ამერიკის შეერთებული შტატები უნდა იყოს პროცესის ნაწილი. სწორედ ეს დაეხმარება უსაფრთხოების ახალი არქიტექტურის ჩამოყალიბებას მსოფლიოს ჩვენი ნაწილისთვის.

ჩვენ უკვე გამოვცადეთ მრავალი შეთანხმება რუსეთთან, მათ შორის მინსკის შეთანხმებები, რომლებიც საბოლოოდ ჩაიშალა. სწორედ ამიტომ, ჩვენ ჯერ თავად უნდა ვიპოვოთ პირდაპირი პასუხები დარჩენილ კითხვებზე და არ დავემალოთ რთულ საკითხებს ფორმულების, ტექნიკური სამუშაო ჯგუფების ან შატლურ დიპლომატიაში დაკარგული უსასრულო დროის მიღმა.

თქვენმა ომმა სამუდამოდ დააშორა უკრაინა და რუსეთი. ფრონტის ხაზი დღეს არის ის ხაზი, საიდანაც დიპლომატია უნდა დაიწყოს.

უკრაინა მზად არის ცეცხლის სრული შეწყვეტისთვის მოლაპარაკებების განმავლობაში. ეს სტანდარტული პრაქტიკაა და ირანის გარშემო მიმდინარე მოვლენები ამას მხოლოდ ამყარებს. რეალური სიჩუმის დამყარების მცდელობა საუკეთესო გზაა ერთმანეთთან საუბრის დასაწყებად. ჩვენ გვჯერა, რომ ეს არ იქნება უბრალოდ მცდელობა, არამედ ცეცხლის რეალური შეწყვეტა - თუკი ეს თქვენც გსურთ.

თქვენ იცით, რომ ამერიკის შეერთებულ შტატებს აქვს შესაძლებლობა, გააკონტროლოს ცეცხლის შეწყვეტა იმ ხაზზე, სადაც საბრძოლო მოქმედებები შეჩერდება.

უკრაინა მზად არის სამხედრო ტყვეების გაცვლისთვის პრინციპით „ყველა ყველაზე“ და ეს შეიძლება გახდეს კარგი პროლოგი ომის დასასრულებლად.

სერიოზული ნაბიჯები უნდა გადაიდგას იმ სამოქალაქო პირებისა და ბავშვების დასაბრუნებლად, რომლებიც ომის დროს იქნენ წაყვანილნი. ჩვენ უნდა განვსაზღვროთ, თუ როგორი მომავალი ელის უკრაინელებისა და რუსების იმ თაობებს, რომლებიც ჩვენს შემდეგ მოვლენ.

თუ თქვენ პირადად არ მიხვალთ იმ დასკვნამდე, რომ ამ ომის დასრულების დროა, უკრაინა გააგრძელებს ბრძოლას თავისი არსებობისთვის. ჩვენ გვეყოლებიან ისინი, ვინც მხარს დაგვიჭერს.

მაგრამ თქვენც მოგიწევთ გაცილებით უფრო სასტიკი ბრძოლა საკუთარი არსებობისთვის - არა რუსეთის, არამედ თქვენი პირადი არსებობისთვის. და ეს არ არის მუქარა ჩემგან ან უკრაინისგან. ეს არის რუსეთის ისტორიის ფაქტი, რომელიც კარგად იცით: როდესაც რუსეთი იღლება, ცვლილებები მოდის.

ჩვენ შეგვიძლია ვიმუშაოთ ამ დაღლილობის მისაღწევად. თქვენ შეგიძლიათ შეაჩეროთ თქვენი ომი. მარადიული ხსოვნა ყველას, ვისი სიცოცხლეც ამ ომმა შეიწირა. დიდება უკრაინას!“ - ნათქვამია წერილში.