Der Spiegel: ურსულა ფონ დერ ლაიენი ევროკავშირში უკრაინელი ლტოლვილების მიღების წესების შეზღუდვას გეგმავს - აღნიშნული ინიციატივა, სავარაუდოდ, გასაწვევი ასაკის მამაკაცებს ეხება

გერმანიასა და ევროკავშირის სხვა ქვეყნებს სურთ გაწვევას დაქვემდებარებულ უკრაინელებს ევროკავშირში მიღება გაურთულონ - ეს ივნისის დასაწყისიდანვე ცნობილია. ახლა ამაზე რეაგირება ევროკომისიის პრეზიდენტმა, ურსულა ფონ დერ ლაიენმაც მოახდინა. მას სურს შეზღუდოს ევროკავშირში უკრაინიდან ომის ლტოლვილთა მიღება. ინფორმაციას ამის შესახებ გერმანული გამოცემა Der Spiegel-ი ავრცელებს.

გერმანელმა პოლიტიკოსმა ბრიუსელის უწყების სახელით დააანონსა ინიციატივა, რომელიც უკრაინის მოქალაქეებისთვის მიღების გამარტივებული წესების ლიმიტირებას ითვალისწინებს. ეს ირკვევა ევროკავშირის მომავალი სამიტის წინ ევროპის სახელმწიფოთა და მთავრობების მეთაურებისთვის გაგზავნილი წერილიდან, რომლის ციტატებსაც საინფორმაციო სააგენტოები dpa და AFP ავრცელებენ.

მასში აღნიშნულია, რომ ევროკომისია გამოვა ინიციატივით, რომლის მიხედვითაც გაგრძელდება დროებითი დაცვის სტატუსი იმ ადამიანებისთვის, რომლებიც უკრაინის წინააღმდეგ რუსეთის აგრესიულ ომს გაურბიან. თუმცა, ამ სტატუსის მოქმედების სფერო ისე უნდა შეიზღუდოს, რომ მისმა გაგრძელებამ ძირი არ გამოუთხაროს უკრაინის თავდაცვისუნარიანობას. ეს შეიძლება აღქმულ იქნეს მინიშნებად იმისა, რომ განსაკუთრებით გაწვევას დაქვემდებარებული მამაკაცების მიღება უნდა გართულდეს. მიუხედავად ამისა, ფონ დერ ლაიენს დაგეგმილი ინიციატივის დეტალები არ დაუკონკრეტებია.

ივნისის დასაწყისში გამართულ ევროკავშირის შინაგან საქმეთა მინისტრების შეხვედრაზე, გერმანია და სხვა წევრი ქვეყნები გამოვიდნენ ინიციატივით, რომ უკრაინელი გაწვევას დაქვემდებარებული მამაკაცებისთვის კავშირში მიღება გაერთულებინათ. საინფორმაციო სააგენტო dpa-ს ცნობით, ფართო მხარდაჭერა მოიპოვა წინადადებამ, რომლის მიხედვითაც ლტოლვილთა მიღების დირექტივა არ გავრცელდეს 23-დან 60 წლამდე ასაკის პირებზე.

ევროკავშირში უკრაინიდან ლტოლვილებზე ვრცელდება ეგრეთ წოდებული „მასობრივი შემოდინების დირექტივა“, რაც იმას ნიშნავს, რომ მათი თავშესაფრის მოთხოვნები ინდივიდუალურად არ განიხილება. ევროკავშირის ეს წესი ამჟამად ძალაშია 2027 წლის 4 მარტამდე. ევროკომისარმა მიგრაციის საკითხებში, მაგნუს ბრუნერმა განაცხადა, რომ უახლოეს მომავალში წარადგენს წინადადებას მისი ვადის გაგრძელების შესახებ. დღემდე ევროკავშირის დაცვის სტატუსით 4.3 მილიონზე მეტმა უკრაინელმა ისარგებლა.