WSJ: უკრაინის ბრძოლის ველზე მიღწეული წარმატებებით მოხიბლული ტრამპი ზელენსკის მიმართ დამოკიდებულებას ცვლის

The Wall Street Journal-ის ინფორმაციით, ერთ წელზე მეტი ხნის განმავლობაში აშშ-ის პრეზიდენტი დონალდ ტრამპი პირად საუბრებში მრჩევლებთან აცხადებდა, რომ უკრაინა ომს აგებდა.

თუმცა, ბოლო კვირებში პრეზიდენტმა უკრაინისა და მისი ლიდერის, ვოლოდიმირ ზელენსკის მიმართ ოპტიმიზმი გამოხატა. ამის შესახებ იმ ადამიანებმა განაცხადეს, რომლებიც მასთან საუბრობდნენ. მათი თქმით, ტრამპზე შთაბეჭდილება მოახდინა ზელენსკის გამძლეობამ, რადგან უკრაინის პრეზიდენტი ბრძოლას რუსეთის ტერიტორიის სიღრმეში აგრძელებს.

წყაროების ინფორმაციით, დამოკიდებულების ცვლილება რამდენიმე შეხვედრის შემდეგ მოხდა, რომლებიც გლობალური სამიტების ფარგლებში გაიმართა. ამ შეხვედრებზე ზელენსკი ცდილობდა ტრამპთან ურთიერთობის გაუმჯობესებას. ეს იყო ევროპელი ლიდერების უფრო ფართო კამპანიის ნაწილი, რომელიც აშშ-ის პრეზიდენტსა და უკრაინის ლიდერს შორის ურთიერთობების გამოსწორებას ისახავდა მიზნად.

წყაროების თქმით, ტრამპს ასევე მოეწონა უკრაინის დრონების წარმოების ინდუსტრია, განსაკუთრებით კი მისი უნარი, წინააღმდეგობა გაუწიოს იმავე ტიპის დრონებს, რომელთა წინაშეც აშშ ირანთან ომის დროს აღმოჩნდა.

ადმინისტრაციის მაღალჩინოსნის განცხადებით, ტრამპს გამარჯვებულები მოსწონს და მისი შეფასებით, ზელენსკი სულ უფრო მეტად ჰგავს ასეთ ადამიანს.

„ჩვენ რეალურად კარგი ურთიერთობა ჩამოგვიყალიბდა. ძნელი დასაჯერებელია, არა?“, - განაცხადა ტრამპმა ივლისში თურქეთში ზელენსკისთან შეხვედრისას.

გამოცემის ცნობით, ეს ზელენსკისთვის ურთიერთობის კარდინალური ცვლილებაა. მანამდე ტრამპთან მისი ურთიერთობა თითქოს საბოლოოდ იყო დაზიანებული. გასულ წელს ტრამპმა ზელენსკის „დიქტატორი“ უწოდა, გააკრიტიკა მისი ლიდერობა და მას მკაცრად დაუპირისპირდა ოვალური კაბინეტის დაძაბული შეხვედრის დროს.

ამ შეხვედრიდან რამდენიმე დღეში ტრამპმა უკრაინისთვის სამხედრო დახმარება და სადაზვერვო ინფორმაციის გაზიარება შეაჩერა, მოგვიანებით კი კიდევ უფრო მეტი დახმარების გაგზავნისგან თავს იკავებდა.

ურთიერთობების ახალი გამოცდა სამშაბათს მოხდება, როდესაც ორი ლიდერი ვაშინგტონში შეხვდება. ეს იქნება მათი პირველი შეხვედრა ოქტომბრის შემდეგ. ზელენსკი აშშ-ის დედაქალაქში რესპუბლიკელი სენატორის, ლინდსი გრემის დაკრძალვაზე დასასწრებად ჩადის და დაგეგმილია მისი ვიზიტი თეთრ სახლშიც.

თუმცა, როგორც გამოცემა წერს, გაურკვეველია, რამდენ ხანს გაგრძელდება ტრამპის ახალი დამოკიდებულება ზელენსკის მიმართ. ტრამპთან დაახლოებულმა პირებმა აღნიშნეს, რომ პრეზიდენტის შეხედულებები ზოგჯერ სწრაფად იცვლება. მათ ასევე გაიხსენეს, რომ რუსეთის პრეზიდენტი ვლადიმერ პუტინი წარსულში ეფექტურად ახერხებდა საკუთარი პოზიციის დაცვას ტრამპთან და მის ზოგიერთ მრჩეველთან საუბრისას.

თეთრი სახლის წარმომადგენელმა განაცხადა, რომ პრეზიდენტი და მისი გუნდი მზად არიან, კონსტრუქციული როლი შეასრულონ რუსეთსა და უკრაინას შორის ომის დასრულებაში და ორივე მხარესთან გააგრძელონ კომუნიკაცია.

მისივე თქმით, ტრამპი ოპტიმისტურად არის განწყობილი, რომ სამშვიდობო შეთანხმების მიღწევა შესაძლებელია.