The Atlantic: ტრამპის ადმინისტრაციას ირანთან ომის საკითხის გადატანა მეორე პლანზე სურს

რამდენიმე თვეა აშშ-ის პრეზიდენტი დონალდ ტრამპი ირანთან კონფლიქტის დასრულებას ვერ ახერხებს. მასშტაბურმა დაბომბვის კამპანიამ ეფექტიანობა დაკარგა, ხოლო აშშ-ის საბრძოლო მასალის მარაგები შემცირდა, იუწყება The Atlantic-ი.

გამოცემის ცნობით, დიპლომატიური პროცესი გაჭიანურდა, რადგან თეირანის ლიდერები პროცესის განზრახ გახანგრძლივებასა და ჰორმუზის სრუტეზე კონტროლის გამკაცრებას ამჯობინებენ. ამჟამინდელ ცეცხლის შეწყვეტის ისედაც უკიდურესად მყიფე რეჟიმსაც კი გლობალურ ენერგეტიკულ ფასებზე მნიშვნელოვანი გავლენა არ მოუხდენია.

დარჩენილი მცირე არჩევანის პირობებში, ტრამპის ადმინისტრაცია შესაძლოა ხანგრძლივ ეკონომიკური ზეწოლის კამპანიაზე გადავიდეს და პირობას დებს, რომ ირანზე ზეწოლას იქამდე გააგრძელებს, სანამ მისი ლიდერები იძულებულნი არ გახდებიან მოლაპარაკებები სერიოზულად განაახლონ.

თუმცა, როგორც გამოცემა იუწყება, ეს მიდგომა შესაძლოა უშედეგო აღმოჩნდეს, თუ აშშ იმ ქვეყნებსაც არ დასჯის, რომლებიც ირანთან კვლავ ვაჭრობენ და მის ეკონომიკას სიცოცხლისუნარიანობის შენარჩუნებაში ეხმარებიან. ამასთან, ტრამპს ისტორიულად მცირე სურვილი გამოუვლენია, დაჰპირისპირებოდა ისეთ ქვეყნებს, როგორებიც არიან ჩინეთი და რუსეთი, ან თუნდაც ჩრდილოეთ კორეა, რომელსაც თეირანთან სტრატეგიული ალიანსი აკავშირებს.

სხვა თუ არაფერი, ახალი მიდგომა თეთრ სახლს საშუალებას აძლევს, თქვას, რომ ის რაღაცას მაინც ცდილობს და, რაც მნიშვნელოვანია, ომზე საუბარი შეწყვიტოს.

ტრამპის მრჩევლები და მოკავშირეები აცხადებენ, რომ გეგმის ერთ-ერთი მიზანია ირანის თემის უკანა პლანზე გადაწევა, იმ იმედით, რომ ბენზინის ფასები მაინც ოდნავ შემცირდება და შუალედური არჩევნების წინ რესპუბლიკელები შეძლებენ ქვეყნის ყურადღება მათთვის უფრო მისაღებ პოლიტიკურ საკითხებზე გადაიტანონ, წერს The Atlantic-ი.

გამოცემის ცნობით, ეს ვერ შეცვლის ახლო აღმოსავლეთში არსებულ რეალობას: ალიანსები დაიძაბა, აშშ-ის სამხედრო ძალებზე ზეწოლა გაიზარდა, ხოლო ირანს რეგიონში გაცილებით მეტი ძალაუფლება აქვს, ვიდრე ომის დაწყებისას, დაახლოებით ექვსი თვის წინ.

თუმცა, ამან შესაძლოა ტრამპს, რომელიც ყურადღების გადატანის ოსტატად მიიჩნევა, სხვა პრიორიტეტებზე გადართვის საშუალება მისცეს - კანადასთან სავაჭრო ომზე, არჩევნების გაყალბების შესახებ ბრალდებებზე, თეთრ სახლთან დაკავშირებულ ახალ ინიციატივებსა თუ სხვა საკითხებზე - და ამ გზით შემოდგომაზე კონგრესის ორივე პალატიდან მინიმუმ ერთის შენარჩუნებაში დაეხმაროს.

„ჩვენ უბრალოდ ვცდილობთ, შუალედურ არჩევნებამდე გავძლოთ“, – განუცხადა გამოცემას ტრამპის ერთ-ერთმა მრჩეველმა.

ამ ეტაპზე ორივე პარტიის სტრატეგები მიიჩნევენ, რომ წარმომადგენელთა პალატის კონტროლის მოპოვების უფრო დიდი შანსი „დემოკრატებს“ აქვთ. მიუხედავად იმისა, რომ სენატში საარჩევნო რუკა „რესპუბლიკელებისთვის“ ხელსაყრელია, ზედა პალატაში ბრძოლა თითქმის თანაბრად ფასდება.

ტენდენციები ისედაც რესპუბლიკელების წინააღმდეგ მუშაობდა: ტრადიციულად, შუალედურ არჩევნებში ძალაუფლების მქონე პარტია უფრო ცუდ შედეგს აჩვენებს, ხოლო ბოლო ათწლეულის განმავლობაში ტრამპის მხარდამჭერები ნაკლებად აქტიურობენ მაშინ, როდესაც საარჩევნო ბიულეტენზე თავად ტრამპის სახელი არ არის, აღნიშნულია სტატიაში.