Reuters: აშშ-ის არმიის მდივანმა დენ დრისკოლმა თეთრ სახლს გადადგომის შესახებ განცხადება წარუდგინა

აშშ-ის არმიის მდივანმა დენ დრისკოლმა თეთრ სახლს გადადგომის შესახებ განცხადება წარუდგინა. ინფორმაციას Reuters-ი საკუთარ წყაროებზე დაყრდნობით ავრცელებს.

სააგენტოს ცნობით, გადადგომის მიზეზად აშშ-ის თავდაცვის მდივანს პიტ ჰეგსეტსა და დრისკოლს შორის ბოლო თვეების განმავლობაში არსებული დაძაბულობა სახელდება.

დრისკოლი, რომელიც აშშ-ის ვიცე-პრეზიდენტ ჯეი დი ვენსთან დაახლოებულ პირად მიიჩნევა, ჰეგსეტის პენტაგონში თანამდებობიდან გათავისუფლებულ ან იძულებით დათხოვნილ მაღალი რანგის მოხელეთა სიაში უახლესი სახელია, წერს სააგენტო.

მისი გადადგომის შესახებ ინფორმაცია იმ ფონზე ვრცელდება, როდესაც აშშ კვლავ ომშია ირანთან და ახლო აღმოსავლეთში ათასობით ამერიკელი სამხედრო მოსამსახურეა განთავსებული.

ჯერჯერობით უცნობია, მიიღო თუ არა თეთრმა სახლმა დრისკოლის გადადგომა.

„დრისკოლმა ადმინისტრაციის წინაშე წამოჭრა შეშფოთება არმიის ტრანსფორმაციასა და საბრძოლო მზადყოფნასთან დაკავშირებით. მისი თქმით, ჰეგსეტი ამ ძალისხმევას აფერხებდა, მათ შორის იმ გენერლების გათავისუფლებით, რომლებიც ამ მიმართულებაზე იყვნენ პასუხისმგებელი“, - განაცხადა წყარომ და აღნიშნა, რომ საუბარი არმიის მოდერნიზაციის მცდელობებს ეხება.

თეთრი სახლის პრესსპიკერმა ანა კელიმ განცხადებაში აღნიშნა, რომ დრისკოლი პრეზიდენტ დონალდ ტრამპის დღის წესრიგის „ამერიკა კვლავ ძლიერ ქვეყნად ვაქციოთ“ განხორციელებაში მნიშვნელოვან როლს ასრულებდა.

„მდივანი დრისკოლი უაღრესად ეფექტური იყო პრეზიდენტ ტრამპის დღის წესრიგის წინ წაწევაში არმიის დეპარტამენტში. ის შესანიშნავად ხელმძღვანელობდა ისტორიული სამხედრო ოპერაციების დროს, აღადგინა აქცენტი საბრძოლო მზადყოფნასა და ლეტალურ შესაძლებლობებზე, ეხმარებოდა რუსეთსა და უკრაინას შორის მოლაპარაკებების პროცესს და კიდევ ბევრს აკეთებდა“, - განაცხადა კელიმ.

წყაროს ინფორმაციით, თანამდებობის დატოვებას აპირებს არმიის მდივნის მოადგილე დეივ ფიცჯერალდი, რომელიც არმიაში ინოვაციების მიმართულებაზე მუშაობდა.

დრისკოლი აშშ-ის არმიის მინისტრის თანამდებობაზე 2025 წლის თებერვალში დაამტკიცეს. ის არმიის მიერ უფრო მოქნილი შესყიდვების სისტემის შექმნასა და იაფი შეიარაღების შეძენაზე მუშაობდა და იარაღის მსხვილ მწარმოებლებს ხშირად აკრიტიკებდა.

არმიის მინისტრი პასუხისმგებელია სამხედრო მოსამსახურეების მომზადებასა და მათი შესაბამისი აღჭურვილობით უზრუნველყოფაზე.