ტრამპი მზად არის სპეცპროკურორ მიულერს ჩვენება მისცეს

აშშ-ის პრეზიდენტმა დონალდ ტრამპმა ჟურნალისტებს განუცხადა, რომ მზად არის სპეცპროკურორ რობერტ მიულერს ჩვენება მისცეს ამერიკის არჩევნებში რუსეთის ჩარევის გამოძიების ფარგლებში. ამასთან, პრეზიდენტის თქმით, ის ჯერ თავის ადვოკატებთან კონსულტაციას გაივლის. ტრამპის განცხადების აუდიოჩანაწერი CNN-მა გაუშვა ეთერში.

„მე ამისთვის მზად ვარ და მინდა, რომ ეს რაც შეიძლება ჩქარა მოხდეს,“- განაცხადა ტრამპმა თეთრ სახლში. კითხვაზე, როდის გაიმართება მისი გამოკითხვა, პრეზიდენტმა განაცხადა, რომ სავარაუდოდ, ორ-სამ კვირაში. 

11 იანვარს,  დონალდ ტრამპმა განაცხადა, რომ სპეციალურ პროკურორთან რობერტ მიულერთან მისი დაკითხვა, "ნაკლებად სავარაუდოა". მანამდე, 9 იანვარს, რამდენიმე მედია გამოცემამ გაავრცელა ინფორმაცია, რომ მიულერისა და ტრამპის საუბარი უახლოეს კვირებში გაიმართება და ამ ეტაპზე ამერიკელი ლიდერის ადვოკატები დაკითხვის პარამეტრებს არეგულირებენ. თვითონ ტრამპი ჯერ კიდევ გასული წლის ივლისში აცხადებდა, რომ მიულერთან შესახვედრად მზად არის.

აშშ-ის იუსტიციის სამინისტრომ, ამერიკის 2016 წლის არჩევნებში რუსეთის შესაძლო ჩარევის საქმეში სპეციალურ პროკურორად, გამოძიების ფედერალური ბიუროს (FBI) ყოფილი დირექტორი რობერტ მიულერი 16 მაისს დანიშნა.

აშშ რუსეთს საპრეზიდენტო არჩევნების დროს დემოკრატიული პარტიის მონაცემთა ბაზის გატეხასა და ინფორმაციის WikiLeaks-ისთვის გადაცემაში ადანაშაულებს.