ტრამპმა არ იცის დაპატიჟეს თუ არა პრინც ჰარისა და მეგან მარკლის ქორწილში

აშშ-ის პრეზიდენტის დონალდ ტრამპის განცხადებით, მან არ იცის მიიღო თუ არა პრინც ჰარისა და მეგან მარკლის საქორწილო მოსაწვევი. ამის შესახებ BBC წერს.

პირს მორგანთან ინტერვიუს დროს, რომელიც ტელევიზია ITV-ის ეკუთვნის, ტრამპი წყვილს "საყვარელს" უწოდებს, ხოლო შეკითხვაზე "მიიღო თუ არა საქორწილო მოსაწვევი", პასუხობს, რომ არ იცის.

2016 წლის საპრეზიდენტო არჩევნების დროს, მეგან მარკლი მხარს ჰილარი კლინტონს უჭერდა, ტრამპს კი მუდმივად აკრიტიკებდა.

22 იანვარს ცნობილი გახდა, რომ 19 მაისს დაგეგმილ სამეფო ქორწილში, აშშ-ის მოქმედ და მის წინამორბედ პრეზიდენტს არ დაპატიჟებენ. ექსპრეზიდენტ ბარაკ ობამასთან მეგობრული ურთიერთობების მიუხედავად, სამეფო ოჯახი მას მოსაწვევს არ გაუგზავნის, რადგან ამ შემთხვევაში, ეტიკეტით მოქმედი პრეზიდენტის, დონალდ ტრამპის დაპატიჟებაც სავალდებულო გახდება. ეს კი პრინც ჰარის არ სურს.

პრინცი ჰარისა და მსახიობ მეგან მარკლის ქორწილი დიდ ბრიტანეთში 2018 წლის 19 მაისს არის დაგეგმილი.

ტრამპის დიდ ბრიტანეთში ვიზიტის მოწინააღდეგეებმა ჯერ კიდევ წლის დასაწყისში ონლაინპეტიცია გააკეთეს, რომელსაც ნახევარ მილიონზე მეტი ხელმოწერა ჰქონდა. პეტიციის ტექსტში ნათქვამი იყო, რომ დონალდ ტრამპი დიდ ბრიტანეთში უნდა შეუშვან როგორც აშშ-ის ადმინისტრაციის ხელმძღვანელი, მაგრამ ის არ უნდა მიიწვიონ ოფიციალური სახელმწიფო ვიზიტით და დედოფალი მას არ უნდა შეხვდეს". 

20 დეკემბერს გავრცელდა ინფორმაცია, რომ დიდ ბრიტანეთში ვიზიტის დროს დონალდ ტრამპისა და დედოფალ ელისაბედ მეორის შეხვედრა არ იგეგმება.