Newsweek-ის რედაქციამ საკუთარ მფლობელებზე გამოძიება დაიწყო. მთავარი რედაქტორი მოხსნეს

2018 წლის იანვარში, ჟურნალ Newsweek-ის ოფისში, მანჰეტენზე ჩხრეკა ჩატარდა. პროკურატურის თანამშრომლები კომპანიის სერვერებით დაინტერესდნენ. ოფიციალურად ჟურნალი ამ თემაზე მოკლე კომენტარით შემოიფარგლა, რედაქციაში მხოლოდ ის თქვეს, რომ შემოწმებას ჟურნალის შინაარსთან არანაირი კავშირი არ ჰქონდა.

18 იანვარს, Newsweek-ში გამოქვეყნდა ცნობა, რომ საგადასახადო უწყებები გამოცემის მფლობელებს სულ ცოტა 2 მილიონ დოლარზე ედავებიან, რომ მათ მიმართ გამოძიება წელიწადზე დიდი ხანია მიმდინარეობს და ეხება სერვერების შეძენისთვის აღებულ სესხებს. ამ ისტორიით რედაქცია დაინტერესდა და საკუთარი გამოძიება დაიწყო. სტატიაზე მუშაობა ჟურნალისტ სელესტ კაცს დაავალეს, რომელმაც გამოცემაში მუშაობა 2017 წელს დაიწყო. გამოძიებაზე ნებართვა მთავარმა რედაქტორმა ბობ რომ გასცა. სელესტ კაცის გარდა ისტორიაზე რამდენიმე ჟურნალისტი მუშაობდა.

რა შედეგებით დასრულდა ჟურნალისტური გამოძიება უცნობია, თუმცა 5 თებერვალს Newsweek-ის რედაქტორი ბობ რო, სელესტ კაცი და ახალი ამბების რედაქტორი კენეტ ლი სამსახურიდან დაითხოვეს. რეპორტიორები ჯოშ კიფი და ჯოშ სოლი სამუშაოს ჩამოაშორეს: მათ აღარ აქვთ წვდომა თავის კომპიუტერებთან და ფოსტასთან. იმავე დღეს ნიუ-იორკის ოფისის ყველა თანამშრომელს გამოუცხადეს, რომ ისინი თავისუფლები არიან და შეუძლიათ სახლებში წასვლა.

2013 წლიდან Newsweek მედიაჰოლდინგ IBT Group-ის საკუთრებაა, რომელიც International Business Times-საც გამოსცემს. შარშან კომპანიამ სახელი შეიცვალა და დაირქვა Newsweek Media Group-ი. სხვა ყოველკვირეული გამოცემების მსგავსად Newsweek-ს ბეჭდური პრესის ბაზარზე შექმნილი კრიზისი შეეხო და ინტერნეტში აუდიტორიის გაზრდის გამო იცვლებოდა; გაყიდვამდე ცოტა ხნით მისი ბეჭდური სახით გამოქვეყნება შეწყვიტეს კიდეც.

Newsweek-ის თანამშრომლებზე დაყრდნობით პრესაში გაჩნდა ცნობები იმის შესახებ, რომ ახალი მფლობელების პირობებში გამოცემაში ბევრი რამ შეიცვალა. დიდი ჟურნალისტური გამოძებების გამოქვეყნება გაგრძელდა, მაგრამ ჟურნალი ფოკუსირდა ონლაინ-ტრაფიკზე და დაიწყო კადრების მკვეთრი ოპტიმიზაცია. ჟურნალში ძველი კორესპონდენტების ადგილი დაიკავეს ახალგაზრდა და დაბალანაზღაურებადმა ჟურნალისტებმა, რომლებსაც ეჩხუბებოდნენ თუ სტატია ქსელში საკმარისს ნახვებს ვერ აგროვებდა. გამოცემის ვებგვერდზე გაჩნდა ნაჩქარევად მომზადებული მასალები ხმაურიანი სათაურებით; ფრილანსერებს ანაზღაურებას უგვიანებდნენ, ზოგჯერ ნახევარი წლითაც. ჟურნალის თანამშრომლებს ცვლილებები არ მოსწონდათ, რადგან მიაჩნდათ, რომ ახალი მფლობელები ჟურნალისტიკის იდეალებს ღალატობდნენ.   

2018 წლის 1 თებერვალს Buzzfeed-მა გამოაქვეყნა გამოძიება იმის შესახებ, თუ რა მეთოდებით შოულობდა ფულს ბოლო დროს Newsweek Media Group-ი. მასალის თანახმად, IBT და Newsweek ყიდულობდნენ ტრაფიკს, თანაც ძირითადად არალეგალურ ვიდეოსერვისებზე; ტრაფიკის დიდი წილი ეკავა არა ცოცხალ მნახველებს, არამედ ბოტებს. ამ "გაბერილ ნახვებს" შემდეგ სარეკლამო კონტრაქტებად გარდაქმნიდნენ.

მანამდე, ისევ Buzzfeed-მა, დაბეჭდა სტატია Newsweek Media Group-ის ტოპმენეჯერ დაიან კანდაპეზე, რომელიც კომპანიაში სამუშაოდ 2016 წელს მივიდა. აღმოჩნდა, რომ რამდენიმე კვირით ადრე ის Reuters-იდან ქვეშევრდომის სექსუალური შევიწროების გამო გაათავისუფლეს. ახლა კანდაპეს მედიაჰოლდინგში დაწყებული შიდა გამოძიების დასრულებამდე უფლებამოსილება დროებით შეჩერებული აქვს.

Newsweek Media Group-ის სახელთან კიდევ ერთი სკანდალია დაკავშირებული. ის ეხება ქრისტიანულ სექტა "საიდუმლო საზოგადოებას", რომელის წევრების იყვნენ ჰოლდინგის წევრები. 2014 წელს კომპანია Mother Jones-ი თავის ჟურნალისტურ გამოძიებაში წერდა, რომ კომპანია სექტის  წევრებს International Business Times-ში სამუშაოდ ქირაობდა, მათ ან ძალიან ცოტას ან საერთოდ არ უხდინენ. Newsweek-ის ყიდვას სექტაში აღიქვამდნენ მთელ მსოფლიოში თავისი გავლენის გავრცელების საშუალებად. ამ სექტაში გამორიცხავენ იმას, რომ Newsweek-ში ჩხრეკა შეიძლება რაიმე ფორმით დაკავშირებული იყოს რელიგიურ ორგანიზაციასთან.