პენტაგონში პოროშენკოს განცხადებას იარაღს მიწოდებაზე ნაადრევი უწოდეს

აშშ-ის თავდაცვის დეპარტამენტი უკრაინის პრეზიდენტის განცხადებას უახლოეს კვირებში შეიარაღების პირველი პარტიის გადაცემასთან დაკავშირებით, ნაადრევად მიიჩნევს. პენტაგონში აცხადებენ, რომ ჯერ ადრეა იმაზე საუბარი, თუ როდის გადაეცემა შეიარაღება უკრაინას.

გუშინ პრესკონფერენციაზე პეტრო პოროშენკომ 2018 წლის გეგმებზე საუბრისას აღნიშნა, რომ უკრაინა აშშ-ისგან იარაღის პირველ პარტიას რამდენიმე კვირაში მიიღებს. მისი თქმით, უკრაინის ხელისუფლებამ იარაღის მიღების შესახებ აშშ-სთან მოლაპარაკებებში მნიშვნელოვან პროგრესს მიაღწია.

როგორც პოროშენკომ აღნიშნა, პირველ რიგში, უკრაინის შეიარაღებული ძალები აშშ-ისგან ანტისნაიპერულ კომპლექსებს მიიღებს, რადგან დონბასში ბევრი უკრაინელი სამხედრო სწორედ სნაიპერის იარაღით იღუპება. „ეს დაგვეხმარება მსხვერპლთა რიცხვის შემცირებაში“, – აღნიშნა უკრაინის პრეზიდენტმა.

შეერთებული შტატების სპეციალურმა წარმომადგენელმა უკრაინის საკითხებში კურტ უოლკერმა დონბასსა და კიევში ვიზიტის დროს განაცხადა, რომ აშშ-მა შესაძლოა უკრაინაში დამატებითი შეიარაღება გაგზავნოს.

გაერთიანებული ერების ორგანიზაციის მონაცემებზე დაყრდნობით, 2014 წლის აპრილიდან დღემდე უკრაინის აღმოსავლეთ ნაწილში მიმდინარე საბრძოლო მოქმედებებს 10 000-ზე მეტი ადამიანის სიცოცხლე შეეწირა.