ლონდონი: რუსეთი საერთაშორისო სამართლის ნორმებს არღვევს, რაც ვიხილეთ საქართველოსა და ყირიმში

რუსეთი არღვევს საერთაშორისო სამართლის ნორმებს, რაც ჩვენ ყირიმსა და საქართველოში ვიხილეთ, – განცხადება ამის შესახებ დიდი ბრიტანეთის წარმომადგენელმა ჯონათან ალენმა გაეროს უშიშროების საბჭოს საგანგებო სხდომაზე გააკეთა.

"რუსეთის მთავრობა გეგმავს მკვლელობებს, ამის გამოცდილება მათ აქვთ, ისინი სხვა ქვეყნების საქმეებში ერევიან. რუსეთი არაფრად მიიჩნევს მშვიდობიანი მოსახლეობის სიცოცხლეს. რუსეთს აქვს დაზვერვის ყოფილი თანამშრომლების შეკვეთილი მკვლელობების გამოცდილება, ისინი მათ კანონიერ სამიზნედ მიიჩნევენ. ამის გათვალისწინებით დიდი ბრიტანეთის მთავრობამ დაასკვნა, რომ, დიდი ალბათობით, სერგეი სკრიპალის მოწამვლის უკან რუსეთი იდგა. ჩვენ დრო მივეცით რუსეთის მთავრობას არსებულ კითხვებზე პასუხის გასაცემად, მაგრამ მათ განმარტება არ გააკეთეს. აქედან გამომდინარე, როგორც მანამდეც განვაცხადეთ, ამან ხაზი გაუსვა მათ პასუხისმგებლობას მომხდარზე. ეს გაეროს წესდების მე-2 მუხლის დარღვევაა, რაც ძალის უკანონოდ გამოყენებას გულისხმობს“, – განაცხადა ჯონათან ალენმა.

გარდა ამისა, ოფიციალური ლონდონი არ აპირებს მოსკოვს წარუდგინოს იმ ნივთიერების ნიმუშები, რომლითაც ყოფილი რუსი ჯაშუში სერგეი სკრიპალი მოწამლეს.

რუსეთის ელჩმა გაეროში ვასილი ნებეზნიამ გაეროს უშიშროების საგანგებო სხდომაზე კიდევ ერთხელ გაუსვა ხაზი, რომ მოსკოვი დაზვერვის ყოფილი აგენტის სერგეი სკრიპალის მოწამვლასთან ყოველგვარ კავშირს უარყოფს და ბრალმდებლებს მტკიცებულებების მოყვანისკენ მოუწოდა.

„ჩვენ ვითხოვთ, მოიყვანოთ მტკიცებულებები, რაც მომხდარში რუსეთის ბრალეულობაზე მიუთითებს“, განაცხადა ნებეზნიამ.

რუსი ჯაშუში სერგეის სკრიპალის მოწამვლის საქმეზე გაეროში უშიშროების საბჭოს საგანგებო სხდომა გაიმართა. ბრიტანულმა მხარემ საბჭოს წევრებს გამოძიების დეტალები მიაწოდა. ლონდონის მტკიცებით, რუსი ჯაშუში ნერვულ-პარალიტიკურ ნივთიერებებით მოწამლეს

ცნობილი გახდა, რომ დიდი ბრიტანეთი 23 რუს დიპლომატს გააძევებს. ამასთან, რუსული მედიის ცნობით, ლონდონმა მოსკოვთან ორმხრივი კავშირები შეაჩერა.

სერგეი სკრიპალი და მისი შვილი იულია 4 მარტს დიდი ბრიტანეთის ქალაქ სოლსბერის სავაჭრო ცენტრში უგონო მდგომარეობაში იპოვეს და საავადმყოფოში გადაიყვანეს.

პოლკოვნიკი სერგეი სკრიპალი 1999 წლამდე რუსეთის გენერალური შტაბის დაზვერვის მთავარ განყოფილებაში („გრუ") მუშაობდა. 2006 წელს მას ბრიტანეთის დაზვერვის სასარგებლოდ ჯაშუშობისთვის 13 წლით თავისუფლების აღკვეთა მიუსაჯეს. 2010 წელს ის რუსულ, ამერიკულ და ბრიტანულ სპეცსამსახურებს შორის გაცვლის ოპერაციის ფარგლებში შეიწყალეს.

სკრიპალის საქმეს რუსეთის პრეზიდენტი ვლადიმერ პუტინიც გამოეხმაურა და ბრიტანელებს ურჩია ყოფილი ჯაშუშის მოწამვლის ინციდენტში ჯერ თავად გაერკვნენ.

აშშ-ის პრეზიდენტის დონალდ ტრამპის განცხადებით, აქამდე არსებული და ცნობილი ყველა ფაქტი ქმნის საფუძველს, რომ საქმეში რუსეთის ბრალეულობა გამოვლინდეს. ტრამპი გეგმავს, საქმე ბრიტანეთის პრემიერმინისტრთან, ტერეზა მეისთან განიხილოს, რათა სიტუაციაში გაერკვეს. მეიმ ყოფილი რუსი ჯაშუშის მოწამვლაზე პასუხისმგებლობა კრემლს დააკისრა.

13 მარტს, აშშ-ის სახელმწიფო დეპარტამენტმა განცხადება გავრცელა, რომლის შინაარსის თანახმად ვაშინგტონი სერგეი სკრიპალის საქმეზე ბრიტანეთის ვერსიას იზიარებს.

ოფიციალური ლონდონი რუსეთთან ყველა მაღალი დონის შეხვედრას აუქმებს, მათ შორის რუსეთის საგარეო საქმეთა მინისტრის სერგეი ლავროვის ლონდონში ვიზიტს. ასევე, რუსეთში დაგეგმილ ფეხბურთის მსოფლიო ჩემპიონატს არ დაესწრებიან დიდი ბრიტანეთის სამეფო ოჯახის წარმომადგენლები და მთავრობის წევრები.