ტრამპის ახალი მრჩეველი ერაყში ინტერვენციას და ირანის დაბომბვას ემხრობოდა

თეთრ სახლში დაბრუნდა პოლიტიკოსი ჯონ ბოლტონი, რომელსაც „მებრძოლ ქორს“ უწოდებენ. ის ერაყში ინტერვენციის ერთ-ერთი მთავარი იდეოლოგია. ტრამპმა ჯონ ბოლტონი უსაფრთხოების საკითხებში მრჩევლად მარტის ბოლოს, ჰერბერ მაკმასტერის ნაცვლად დანიშნა.

ჯონ ბოლტონი ცნობილია თავისი ულტრაკონსერვატიული შეხედულებებით. გარდა იმისა, რომ ის ერაყში ინტერვენციის ერთ-ერთი მთავარი მომხრე და იდეოლოგი იყო, მას მიაჩნია, რომ აშშ ვალდებულია ჩრდილოეთ კორეას პრევენციული დარტყმა მიაყენოს და რუსეთის წინააღმდეგ კიბერ-ომი გააჩაღოს. ბოლტონის მსგავს პოლიტიკოსებს „მებრძოლ ქორებს“ ან „ომის პარტიის“ წარმომადგენლებს უწოდებენ.

ბოლტონი ახლა 69 წლისაა. ადმინისტრაციაში უმნიშვნელო თანამდებობებზე ჯერ კიდევ რიჩარდ ნიქსონის დროიდან მუშაობდა. უფროსი ბუშის პრეზიდენტობისთვის ის საერთაშორისო ორგანიზაციებთან კომუნიკაციის ბიუროში უფროსის მოადგილე იყო და აშშ-ის საგარეო პოლიტიკაზე დიდი გავლენა ჰქონდა. ბილ კლინტონის არჩევის შემდეგ მან სახელმწიფო დეპარტამენტი დატოვა და იურიდიული ფირმის პარტნიორი გახდა. მთავრობაში უმცროსი ჯორჯ ბუშის გაპრეზიდენტების შემდეგ დაბრუნდა, რომელმაც ის შეიარაღებასა და საერთაშორისო უსაფრთხოების კონტროლზე პასუხისმგებელ სახელმწიფო მდივნის მოადგილედ დანიშნა. იმ ადამიანებს შორის, ვინც ერაყში ომის დაწყებისათვის საფუძველი მოამზადა, ერთ-ერთი მთავარი ფიგურა სწორედ ბოლტონი იყო.

როგორც მოგვიანებით გაირკვა ერაყში მასობრივი განადგურების იარაღი არ აღმოჩნდა, მაგრამ ბოლტონი დღემდე დარწმუნებულია, რომ ომის დაწყებაზე გადაწყვეტილება სწორი იყო, რაშიც მას დღევანდელი პრეზიდენტი დონალდ ტრამპი არ ეთანხმება, რომელსაც არაერთხელ უთქვამს, რომ აშშ ერაყში არ უნდა შეჭრილიყო.

როდესაც სახელმწიფო მდივანი კონდოლიზა რაისი გახდა, ბოლტონმა სამსახური დაკარგა. 2005 წელს ის გაეროში აშშ-ის წარმომადგენლად ბუშმა დანიშნა, თუმცა დროებით წარმომადგენლად, რადგან კონგრესმა, რომელშიც იმ დროს უმრავლესობას დემოკრატები შეადგენდნენ, ბოლტონის კანდიდატურის დამტკიცებაზე უარი თქვეს. მიუხედავად მყიფე სტატუსისა, მან სახელი გაითქვა, როგორც აშშ-ის ერთ-ერთმა ყველაზე ხისტმა და არადიპლომატიურმა ელჩმა გაეროში.

ბოლტონი ცნობილია ასევე თავისი სტატიებით საზოგადოებრივ-პოლიტიკურ თემატიკაზე სხვადასხვა გამოცემებში, დაწყებული კონსერვატიული The Washington Times-იდან დასრულებული ლიბერალური The New York Times-ით.

2015 წელს, როდესაც ირანის ბირთვულ პროგრამაზე შეთანხმება მზადდებოდა მან The New York Times-ში გამოქვეყნა სვეტი სახელმწოდებით „ირანის ბომბის შესაჩერებლად საჭიროა ირანის დაბომბვა“. ანალოგიურ მიდგომას ემხრობა ის ჩრდილოეთ კორეის მიმართაც.

თავდაპირველად ბოლტონს არ სჯეროდა აშშ-ის საპრეზიდენტო არჩევნებში რუსეთის ჩარევის, მაგრამ მალე აზრი შეიცვალა და რუსეთთან კიბერომის ინიციატივით გამოვიდა. ის ემხრობოდა ისეთი კიბერშეტევის მოწყობას, რომელიც რუსეთს ჭკუას ასწავლიდა და სხვა ქვეყნებს აშშ-ის წინააღმდეგ ჰაკერების გამოყენების სურვილს დაუკარგავდა.