უნგრეთის არჩევნებში მმართველმა კოალიციამ მესამე ვადით გაიმარჯვა

უნგრეთის საპარლამენტო არჩევნებში მმართველმა კოალიციამ გაიმარჯვა, რომელშიც პარტია “ფიდესი - უნგრეთის სამოქალაქო კავშირი“ და "ქრისტიანულ-დემოკრატიული სახალხო პარტია" შედიან. კოალიციამ, მოქმედი პრემიერმინისტრის ხელმძღვანელობით, ხმების 48, 6 პროცენტი მოაგროვა. ამგვარად უნგრეთის სახალხო კრებაში ორბანის მხარდამჭერებმა 199-დან 133 ადგილი მოიპოვეს. ინფორმაციას BBC ავრცელებს.

მონაცემები ბიულეტენების 95%-ის დათვლის შედეგად განისაზღვრა. მეორე ადგილზე, დიდი სხვაობით, მემარჯვენე რადიკალების ეროვნულ კონსერვატული მოძრაობა “უკეთესი უნგრეთისთვისაა“. მან ხმათა 19,7 პროცენტი მოაგროვა (26 მანდატი).

მესამე ადგილზე 12,2 პროცენტით (20 მანდატი)  უნგრეთის სოციალისტური პარტია და  “დიალოგი უნგრეთის სახელით“ არიან. სახალხო კრებაში 9 ადგილი “დემოკრატიულ კოალიციას“ ერგო, პარტიას “პოლიტიკა სხვანაირიც შეიძლება იყოს“ კი - 8 მანდატი. თითო-თითო მანდატი ერგოთ სოციალ-ლიბერალურ პარტიას “ერთად“, ერთ დამოუკიდებელ კანდიდატს და გერმანიის ეთნიკური უმცირესობის წარმომადგენელს.

ვიქტორ ორბანი უკვე 8 წელია, უნგრეთის მთავრობის მეთაურის პოსტს იკავებს. ის ცნობილია თავისი ხისტი დამოკიდებულებით მიგრანტების მიმართ. თუმცა, მისი მკაცრი საიმიგრაციო პოლიტიკა მოსახლეობის დიდ ნაწილს მოსწონს.

საქართველოში ოფიციალური ვიზიტით ორბანი გასული წლის 21 აპრილს იყო. მაშინ თბილისში სტუდენტების ორი პარალელური აქცია მოეწყო. აუდიტორია 115-მა და CEU-ს კურსდამთავრებულებმა უნგრეთის ხელისუფლების მიერ CEU-ს წინააღმდეგ მიღებულ კანონი გააპროტესტეს. მეორე აქციაზე კი პირიქით, უნგრეთის ანტილიბერალურ პოლიტიკას დაუჭირეს მხარი.

ცენტრალური ევროპის უნივერსიტეტი" (CEU) ჯორჯ სოროსის ფონდმა პოსტსაბჭოთა ბუდაპეშტში 1991 წელს დააარსა. უნგრეთის პარლამენტმა 3 აპრილს, განათლების შესახებ კანონში ცვლილებები დაამტკიცა, რომლის თანახმად სოროსის უნივერსიტეტის დახურვა შესაძლებელი გახდა. გავრცელებული მოსაზრებით, ამ მიზნის მიღწევას ორბანის მმართველი პარტია უნგრეთში დიდი ხნის განმავლობაში ცდილობდა.