პრაღა შეშფოთებულია ჩრდილოეთ კორეის ელჩის გაუჩინარების გამო

ჩეხეთში ჩრდილოეთ კორეის ელჩი კიმ ფხენ ილი, რომელიც ჩრდილოეთ კორეის ლიდერის კიმ ჩენ ინის ბიძაა, პრაქტიკულად საზოგადოებაში არ ჩნდება. არსებობს ინფორმაცია, რომ მის სიცოცხლეს საფრთხე ემუქრება, - წერს პრაღული პორტალი Novinky, სამხრეთ კორეულ გამოცემებზე დაყრდნობით.

„როგორც ჩანს, კიმ ფხენ ინი ყველას თავს არიდებს, ცდილობს შეუმჩნევლად გადაადგილდეს საელჩოს შენობასა და რეზიდენციას შორის“, - წერს გამოცემა.

კიმ ფხენ ილი, რომელიც ჩრდილოეთ კორეის ლიდერის კიმ ირ სენას უმცროსი ვაჟი და ამჟამინდელი ლიდერის კიმ ჩენ ინის ბიძაა, პრაღაში 2015 წელს პოლონეთიდან ჩავიდა, სადაც 17 წელი ჩრდილოეთ კორეის ელჩად იმუშავა. იმავე წლის იანვარში ის მიიღო ჩეხეთის პრეზიდენტმა და უფლებამოსილების სიგელი გადასცა.

შემდეგ კიმ ფხენ ილი მხედველობის არიდან გაქრა, იუწყებიან ჩეხური გამოცემები. პრაღული პორტალი Novinky აღნიშნავს, რომ შეიძლება 63 წლის ელჩს ჩრდილოეთ კორეის ლიდერის მოკლული ძმის მსგავსად საფრთხე ემუქრებოდეს. ელჩი ამიტომაც იქცევა ასე ფრთხილად.

ერთ-ერთი სამხრეთ კორეელი დიპლომატის თქმით, რომლის გვარიც არ სახელდება, ჩეხეთის ხელისუფლება ყურადღებით ადევნებს თვალს ჩრდილოეთ კორეის ელჩის გადაადგილებას და იმას, თუ ვისთან ერთად იმყოფება ის.

ჩრდილოეთ კორეის ლიდერის ძმა კიმ ჩენ ნამი 13 თებერვალს მალაიზიაში, კუალა-ლუმპურის აეროპორტში მოკლეს. პოლიციამ განაცხადა, რომ ის ნერვულ-პარალიტიკური აგენტის VX-ის ზემოქმედებისგან დაიღუპა. ამ ნივთიერებისგან დამზადებული ქიმიური იარაღი გაეროს კვალიფიცრებული აქვს, როგორც მასობრივი განადგურების იარაღი.

კიმ ჩენ ნამის მკვლელობის საქმეზე რამდენიმე ეჭვმიტანილია დაკავებული. ქალმა, რომელმაც მას სახეზე აღნიშნული ნივთიერება შეაყარა აცხადებს, რომ ტელე-გათამაშებაში მონაწილეობდა, რისთვისაც 100 დოლარი გადაუხადეს.