მალაიზიის ხელისუფლებამ ყოფილ პრემიერმინისტრს ქვეყნის დატოვება აუკრძალა

მალაიზიის ხელისუფლებამ ყოფილ პრემიერმინისტრ ნაჯიბ რაზაკს ქვეყნის დატოვება აუკრძალა, ინფორმაციას BBC ავრცელებს.

მალაიზიის იმიგრაციის საკითხების დეპარტამენტმა ნაჯიბ რაზაკი და მისი ცოლი როსმა მანსური „შავ სიაში“ შეიყვანა და ისინი ქვეყნის საზღვრებს ვერ დატოვებენ. უწყებამ გადაწყვეტილება გამოაქვეყნა რამდენიმე წუთში მას შემდეგ, რაც ყოფილმა პრემიერმინისტრმა Facebook-ზე დაწერა, რომ შაბათს ოჯახთან ერთად ერთი კვირით გაემგზავრება შვებულებაში. იმიგრაციის სამსახურის გადაწყვეტილების გასაჯაროების შემდეგ რაზაკმა ისევ სოციალურ ქსელში დაწერა, რომ პატივს სცემს ხელისუფლების გადაწყვეტილებას და დარჩება ქვეყანაში.

მანამდე, 9 მაისს საყოველთაო არჩევნებში მოულოდნელად გაიმარჯვა ქვეყნის ყოფილი პრემიერმინისტრის მაჰათირ მოჰამედის  (1981-2003) ოპოზიციურმა კოალიციამ და პარლამენტში მანდატების მარტივი უმრავლესობა მოიპოვა. ქვეყნის პოსტკოლონიალური ისტორიის განმავლობაში ეს პირველი შემთხვევაა, როდესაც ოპოზიციამ ხელისუფლებაში 60 წლის განმავლობაში მყოფი პოლიტიკური გაერთიანება „ეროვნული ფრონტი“ დაამარცხა. რაზაკმა დამარცხება აღიარა და განაცხადა, რომ ხალხის არჩევანს პატივს სცემს.

მალაიზიამ დიდი ბრიტანეთისგან დამოუკიდებლობა 1957 წელს მოიპოვა. ამ ქვეყანაში მონარქიას წარმომადგენლობითი ფუნქცია აქვს, თუმცა ქვეყნის კონსტიტუცია ითვალისწინებს სიტუაციებს, როდეაც მოქმედ მეფეს შეუძლია ესა თუ ის გადაწყვეტილება ან დაამტკიცოს ან არა. მალაიზიაში სამეფო ტახტს რიგითობით იკავებენ სასულთონების ხელმძღვანელები, რომელთაგან შედგება ქვეყანა.