უკრაინას ავტოკეფალიის საკითხში საქართველოს პატრიარქის მხარდაჭერის იმედი აქვს

ეკლესიის ავტოკეფალიის საკითხზე საქართველოს პატრიარქის მხარდაჭერის იმედი გვაქვს- ამის შესახებ უკრაინის პარლამენტის თავმჯდომარემ განაცხადა. ინფორმაციას რადას პრესსამსახური ავრცელებს.

„ჩვენ იმედი გვაქვს, რომ საქართველოს პატრიარქი და საქართველოს მართლმადიდებელი ეკლესია მხარდაჭერას გამოუცხადებენ უკრაინის და ყველა უკრაინელის სწრაფვას, რომ შეიქმნას უკრაინის მართლმადიდებლური ეკლესიის ავტოკეფალია. სამწუხაროდ ეკლესიას იყენებენ როგორც პოლიტიკურ ინსტრუმენტს „რუსული სამყაროს“ აგრესიისა და უკრაინელების მკვლელობის პროპაგანდის მიზნით. სწორედ ამ საფრთხეების გათვალისწინებით, უკრაინული ავტოკეფალური ეკლესიის შექმნა, აუცილებლად მიგვაჩნია“, – განაცხადა ანდრეი პარუბიმ.

უკრაინის პარლამენტმა მხარი დაუჭირა მსოფლიო პატრიარქის, ბართლომესადმი პრეზიდენტ პეტრო პოროშენკოს მიმართვას, ავტოკეფალია მიანიჭოს უკრაინის მართლმადიდებელ ეკლესიას. პოროშენკოს განცხადებით, უკრაინის ეკლესიის ავტოკეფალია იქნება ისტორიული სამართლიანობის აღდგენა და მოცილება რუდიმენტებისა იმ პოლიტიკური პროექტიდან, რომელიც რუსეთის მართლმადიდებელმა ეკლესიამ მოიფიქრა და „რუსულ სამყაროდ“ იწოდება.

უკრაინის პრეზიდენტი 9 აპრილს, თურქეთში ვიზიტისას შეხვდა მსოფლიო პატრიარქს, კონსტანტინოპოლის არქიეპისკოპოსს, ბართლომეს. შეხვედრიდან რამდენიმე დღეში პეტრო პოროშენკომ განაცხადა, რომ ავტოკეფალიის საკითხი შესაძლოა, განიხილონ მართლმადიდებელი ეკლესიის კრებაზე, რომელიც 28 ივლისს უნდა ჩატარდეს.

ამჟამად უკრაინაში არსებობენ მოსკოვის საპატრიარქოს კანონიკური უკრაინული ეკლესია და ორი არაღიარებული - კიევის საპატრიარქოს მართლმადიდებელი ეკლესია და უკრაინის მართლმადიდებელი ეკლესია.

თუ მსოფლიო პატრიარქი უკრაინის მიმართვას დააკმაყოფილებს, უკრაინის გაერთიანებული ავტოკეფალიური ეკლესია კვლავ დაექვემდებარება კონსტანტინოპოლის ეკლესიას, როგორც ეს იყო 998 წლიდან 1686 წლამდე. კიევის მიტროპოლია მოსკოვის საპატრიარქოს 1686 წელს შეუერთდა.