ფრანსუა ფიიონის ცოლმა სკანდალის ფონზე პირველი ინტერვიუ მისცა

საფრანგეთის პრეზიდენტობის კანდიდატის, ფრანსუა ფიიონის ცოლი პენელოპა ირწმუნება, რომ ქმართან კანონიერად მუშაობდა. ამ თემაზე ფიიონის ცოლმა ფრანგულ გამოცემა Journal du Dimanche-ს ინტერვიუ მისცა. „მას სჭირებოდა ადამიანი, რომელიც მის დავალებებს შეასრულებდა“, - ამბობს პენელოპა ფიიონი. მისივე თქმით, ქმრის გადაწყვეტილებით, ასეთ დავალებებს სწორედ ის ასრულებდა. პენელოპას განცხადებით, ყველაფერი კანონიერად და ღიად მოხდა. პრეზიდენტობის კანდიდატის ცოლი ამტკიცებს, რომ ქმართან მისი მუშაობა მხოლოდ ტექნიკურ ხასიათს ატარებდა და პოლიტიკას არ ეხებოდა. "მე ვეხმარებოდი მის მდივანს. ქმრისთვის ვამზადებდი კორესპონდენციებს მის საარჩევნო ოლქთან დაკავშირებით,"- ამბობს პენელოპა.

მისივე თქმით, ინტერვიუს მიცემის გადაწყვეტილება დამოუკიდებლად მიიღო, რადგან მიიჩნევს, რომ საზოგადოებამ ბევრი დეტალი არ იცის. მისივე თქმით, ის ნანობს, რომ ხალხის წინაშე ადრე არ გამოვიდა. „ამ რამდენიმე დღის განმავლობაში მე დამიკავშირდა ბევრი მეგობარი და ახლობელი. ისინი მეოთხებოდნენ, ცოცხალი ვარ თუ არა, სად ვიმყოფები, ხომ არ ვეყრები ქმარს. ამიტომ დავთანხმდი ამ ინტერვიუს, რომ გავრცელებულ ჭორებს ბოლო მოეღოს“, - დასძინა პენელოპა ფიიონმა. პრეზიდენტობის კანდიდატის ცოლმა ფიიონის მხარდამჭერებს მოიწოდა, რომ არ დანებდნენ.

სკანდალის ფონზე ფრანსუა ფიიონს თანაგუნდელები ტოვებენ. გუშინ, ფიიონის საარჩევნო შტაბის უფროსი დაკავებული თანამდებობიდან გადადგა. BBC-ის ცნობით,პატრიკ სტეფანინის მიერ გავრცელებული წერილის მიხედვით, მან „რესპუბლიკური პარტიის“ პრეზიდენტობის კანდიდატს საპრეზიდენტო კამპანიის შეწყვეტა მისი ცოლის საქმიანობასთან დაკავშირებით გამოძიების დაწყებისთანავე ურჩია. ყოფილმა თანაგუნდელმა ასევე აღნიშნა, რომ ფიიონი, სავარაუდოდ, არჩევნების მეორე ტურში ვერ გავა.

საარჩევნო შტაბში მუშაობაზე უარი განაცხადა ასევე ფიიონის მრჩეველმა საერთაშორისო საკითხებში ბრუნო ლე მარმაც. თანამდებობა დატოვა პრესსპიკერმა ტიერი სოლერმაც. ეს უკანასკნელი ფიიონის კამპანიას პრაიმერიზის პერიოდში უძღვებოდა, რომელშიც ყოფილმა პრემიერმა გაიმარჯვა.

საფრანგეთის პროკურატურა ფიიონის ოჯახისთვის უკანონო გადარიცხვების საქმეს იძიებს. თავიდან საქმეში მხოლოდ პერზიდენტობის კანდიდატის ცოლი პენელოპა ფიგურირებდა, თუმცა მოგვიანებით საგამოძიებო ორგანოები მათი შვილების შემოსავლებითაც დაინტერესდნენ. პრეზიდენტობის კანდიდატს და ყოფილ პრემიერმინისტრს იმაში ადანაშაულებენ, რომ ცოლი და შვილები ფიქტიურად დაასაქმა და ხელფასის სახით ბიუჯეტის ფულს უხდიდა. ფიიონი ბრალდებებს უარყოფს.