ბელგიის ექსპრემიერი: ევროპაში არსებობს მეხუთე კოლონა - პუტინის გულშემატკივრები

ბელგიის ყოფილმა პრემიერმინისტრმა, ევროპარლამენტის წევრმა გაი ვერჰოფსტადტმა ევროპის ზოგიერთი მემარჯვენე და მკვეთრად მემარჯვენე პარტიის ლიდერები რუსეთის პრეზიდენტის, ვლადიმერ პუტინის ინტერესების გატარებაში დაადანაშაულა. ამის შესახებ "რადიო თავისუფლება" წერს.

ვერჰოფსტადტმა სოციალურ ქსელში დაწერა, რომ ევროპაში არსებობს მეხუთე კოლონა - პუტინის გულშემატკივრები, რომლებსაც სურთ შიგნიდან გაანადგურონ ევროპა და ლიბერალური დემოკრატია.

ევროპარლამენტის წევრმა ასეთ პოლიტიკოსებად დაასახელა ფრანგი, ჰოლანდიელი, ბრიტანელი და იტალიელი მემარჯვენეები და ულტრა-მემარჯვენეები მარინ ლე პენი, გერტ ვილდერსი, ნაიჯელ ფარაჯი და მატეო სალვინი, პოლონეთის ყოფილი პრემიერმინისტრი იაროსლავ კაჩინსკი და უნგრეთის პრემიერმინისტრი, ვიქტორ ორბანი. ვერჰოფსტადტის განცხადებით, ისინი კრემლის ფულს და აგენტურას იყენებენ.

ბელგიის ყოფილმა პრემიერმინისტრმა ევროკავშირიდან დიდი ბრიტანეთის გასვლის მიზნით რუსეთთან შეთქმულებაში დაადანაშაულა ბრიტანელი ბიზნესმენი არონ ბენქსი. ევროკავშირიდან გაერთიანებული სამეფოს გასვლის მხარდამჭერ ერთ-ერთ კამპანიას სწორედ არონ ბენქსი აფინანსებდა. მისმა ადვოკატმა, განაცხადა, რომ გაი ვერჰოფსტადტი ბენქსის რეპუტაციას ხელყოფს და ბელგიელ პოლიტიკოსს მოუწოდა, განცხადება წაშალოს. თავად არონ ბენქსმა რუსეთისგან დაფინანსების ბრალდებას აღმაშფოთებელი უწოდა და ვერჰოფსტადტს სასამართლოში ჩივილით დაემუქრა.

ამასთან, ამერიკული ტელეკომპანია CNN თავის წყაროებზე დაყრდნობით იუწყება, რომ არონ ბენქსს პოლიტტექნოლოგ ენდი ვიგმორთან ერთად მუდმივი კონტაქტი ჰქონდა დიდ ბრიტანეთში რუსეთის საელჩოს მაღალჩინოსნებთან. CNN-ის ცნობითვე, 2015-2016 წლებში ბენქსს შესაძლებლობა ჰქონდა მონაწილეობა მიეღო ექვსი ოქროს მაღაროს შეერთებაში კომპანიასთან, რომელიც ნაწილობრივ ეკუთვნოდა რუსეთის მთავრობის აპარატის უფროსის ყოფილ მოადგილეს, კირილ ანდროსოვს. თავად ბიზნესმენი არონ ბენქსი ირწმუნება, რომ გარიგების შეთავაზება მართლაც მიიღო, თუმცა ექსპერტებთან კონსულტაციის შემდეგ უარი თქვა.

Europe has a fifth column in its ranks: Putin's cheerleaders who want to destroy Europe & liberal democracy from within: Le Pen, Wilders, Farage, Orbàn, Kaczynski, Salvini use Kremlin money & intel. Like Farage's friend Arron Banks, who colluded w/ Russians to deliver #Brexit

— Guy Verhofstadt (@guyverhofstadt) June 13, 2018