აშშ-ის წინააღმდეგობის მიუხედავად, ჯანდაცვის მსოფლიო ორგანიზაციამ ძუძუთი კვების მხარდამჭერი რეზოლუცია მიიღო

22-26 მაისს ჟენევაში ჯანდაცვის მსოფლიო ორგანიზაციის 71-ე სესია გაიმართა, რომელზეც ეკვადორმა ძუძუთი კვების დადებითი მხარეების შესახებ რეზოლუცია წარადგინა. რეზოლუციის ტექსტში ეწერა, რომ ძუძუთი კვება ჩვილის განვითარებაზე დადებითად მოქმედებს. ტექსტში ასევე საუბარი იყო ხელოვნური კვების პროდუქტებთან დაკავშირებით არასწორი ეტიკეტირებისა და ტყუილისშემცველი სარეკლამო ინფორმაციის გამოყენების შეზღუდვებზე. 

როგორც The New York Times-ი წერს, ამერიკულმა დელეგაციამ მთლიანად შეცვალა სესიაზე რეზოლუციის პროექტის განხილვის მიმდინარეობა. გამოცემის ცნობით, აშშ-ის წარმომადგენლები შეეცადნენ, რომ რეზოლუციის ტექსტიდან ამოეღოთ ორი ძირითადი პუნქტი: 1. ჯანდაცვის მსოფლიო ორგანიზაციის მონაწილე ქვეყნების ვალდებულება, რომ მხარდაჭერა გამოეცხადებინათ, ხელი შეეწყოთ და დაეცვათ სახელმწიფო დონეზე ძუძუთი კვების იდეა; 2. ისეთი რეკლამების შეზღუდვა, რომელში წარმოდგენილი ხელოვნური კვების პროდუქციამაც შესაძლოა ბავშვის ჯანმრთელობას ზიანი მიაყენოს.

The New York Times-ი ირწმუნება, რომ როდესაც ამერიკულმა დელეგაციამ რეზოლუციის ტექსტიდან ამ საკითხების ამოღება ვერ შეძლო, შანტაჟსა და მუქარას მიმართა. დელეგაციის წევრები ეკვადორს სავაჭრო სანქციების დაწესებითა და კოლუმბიასთან საზღვარზე უკანონო იარაღის ვაჭრობასთან ბრძოლის ფარგლებში დახმარების შეწყვეტით დაემუქრნენ. ამ მუქარის გამო ეკვადორის ხელისუფლებამ უკან დაიხია.

იმავე რეზოლუციის წარმდგენი ახალი ქვეყნის მოძებნა კი გაჭირდა: აფრიკისა და სამხრეთ ამერიკის ათობით ქვეყანამ უარი თქვა პროექტის ხელახალ წარდგენაზე. 

როგორც The New York Times-ი წერს, ჟენევაში, შეხვედრებში ბავშვთა კვების ინდუსტრიის ევროპელი და ამერიკელი ლობისტებიც მონაწილეობდნენ. ბოლო წლების განმავლობაში ხელოვნური კვების პროდუქტების გაყიდვები დაეცა, ამის მიზეზად კი გამოცემა იმას ასახელებს, რომ სულ უფრო მეტი ქალი ანიჭებს უპირატესობას ჩვილის ძუძუთი კვებას. 

საბოლოოდ, აშშ-ის მცდელობა არ გამოუვიდა და 22 მაისს, კანადამ, ბოცვანამ, რუსეთმა, გამბიამ, განამ, მოზამბიკმა, ნეპალმა, პაკისტანმა, პანამამ, სენეგალმა, სიერა-ლიონემ, ტაილანდმა და ზამბიამ რეზოლუციის ახალი პროექტი წარადგინეს, რომელიც სესიაზე დამტკიცდა კიდეც.