სლოვაკეთში „ღამის მგლების“ ბანაკის მოწყობას აპროტესტებენ

ვლადიმერ პუტინთან დაახლოებულმა ბაიკერთა კლუბის, „ღამის მგლების“ სლოვაკეთის დანაყოფმა, დედაქალაქიდან, ბრატისლავადან 70 კილომეტრის მოშორებით, ძველი ტანკები და ჯავშანსატანკო ტექნიკა განათავსა. ამას არა მხოლოდ მოქალაქეების, არამედ, - მმართველი გუნდის წევრთა კრიტიკა მოჰყვა. ამის შესახებ BBC წერს. 

სლოვაკეთის საგარეო საქმეთა მინისტრმა, Peter Susko-მ ფაქტს “შემაშფოთებელი“ უწოდა. 

„ღამის მგლებმა“ მავთულხლართების მიღმა ძველი ტანკები და ჯავშანსატანკო ტექნიკა განათავსეს. ეს ტერიტორია სლოვაკეთის „რამის მგლების“ მეთაურს, ჯოზეფ ჰამბალეკს ეკუთვნის. ბაიკერთა კლუბი ტერიტორიაზე მეორე მსოფლიო ომის მუზეუმის მოწყობას გეგმავს. 

რამდენიმე დღის წინ „ღამის მგლები“ სკოვაკეთში ჟურნალისტებს დაუპირისპირდნენ. მათი მეთაური მედიის წარმომადგენლებს იარაღითაც დაემუქრა და უბრძანა, ბანაკის დრონებით გადაღება შეეწყვიტათ. 

„ღამის მგლები“ ნაციონალისტური ჯგუფია, რომელიც რუსეთს ყირიმის დაკავებაში დაეხმარა. 

სლოვაკეთში მათ წინააღმდეგ პეტიციაც შეიქმნა, რომელსაც „ღამის მგლები - პუტინის შეიარაღებული მოწინავე რაზმი ევროკავშირის, ნატოს და სლოვაკეთის წინააღმდეგ ჰიბრიდულ ომში“ ჰქვია. 

„ღამის მგლების“ 50-მდე ბაიკერი გასული წლის მაისში საქართველოში აპირებდა შემოსვლას. მათ 9 მაისთან დაკავშირებული ღონისძიების ფარგლებში, პერფორმანსის გამართვა ჰქონდათ დაანონსებული. ამას საზოგადოების მწვავე რეაქცია მოჰყვა. საბოლოოდ, ბაიკერები ქვეყანაში არ შემოუშვეს. 

„ღამის მგლები“ საქართველოში 2015 წელსაც გამოჩნდნენ. მაშინ, მათი ვიზიტის დროს, ქართველმა ბაიკერებმა ​ვაკის პარკთან მორიგეობა მოაწყვეს. პარკში, ტრადიციულად, მეორე მსოფლიო ომში გამარჯვების დღისადმი მიძღვნილი საზეიმო ღონისძიებები იმართებოდა, ქართველი ბაიკერები კი მორიგეობდნენ, რომ პარკში „ღამის მგლები“ არ შეეშვათ.