რუსეთის ტელევიზია აფრიკაში რუსი ჟურნალისტების მკვლელობაზე სიუჟეტებში „ვაგნერს“ არ ახსენებს

რუსული ტელეარხები ცენტრალური აფრიკის რესპუბლიკაში რუსი ჟურნალისტის, ოპერატორისა და რეჟისორის მკვლელობის შესახებ მომზადებულ სიუჟეტებში არ ახსენებენ მიზეზს, რის გამოც ისინი ცენტრალურ აფრიკაში ჩავიდნენ. საუბარია კერძო სამხედრო კომპანია „ვაგნერის“ შესახებ, რომელზეც რუსი ჟურნალისტები ფილმს ამზადებდნენ. ამ გარემოებაზე ყურადღებას რუსული ტელეკომპანია "დოჟდი" ამახვილებს ყურადღებას, - წერს „რადიო თავისუფლება“.

რუსეთის ფედერალური ტელეარხების საინფორმაციო გამოშვებებში ამბობენ, რომ ჟურნალისტები შესაძლოა "ისლამური სახელმწიფოს" ტერორისტებმა მოკლეს. ცნობებს იმის თაობაზე, რომ ჟურნალისტები იღებდნენ ფილმს „ვაგნერის“ რიგებში მებრძოლ დაქირავებულ რუსებზე, „უაზრობა“ უწოდეს რუსეთის საგარეო საქმეთა სამინისტროში. 

ცენტრალური აფრიკის რესპუბლიკაში ჟურნალისტი ორჰან ჯემალი, რეჟისორი ალექსანდრ რასტორგუევი და ოპერატორი კირილ რადჩენკო 31 ივლისს მოკლეს, მათი მძღოლი თავდასხმას გადაურჩა.

ისინი ონლაინ სააგენტო „გამოძიებათა სამმართველოს ცენტრის“ შეკვეთით დოკუმენტურ ფილმს იღებდნენ. სააგენტოს მუშაობას მიხაილ ხოდორკოვსკი - ყოფილი ოლიგარქი და პრეზიდენტ პუტინის ოპონენტი, აფინანსებს.

"ვაგნერი" რუსული კერძო სამხედრო კომპანიაა, რომლის წევრებიც მსოფლიოს სხვადასხვა ქვეყნებში, კონფლიქტის ზონებში საომარ მოქმედებებში, კონტრაქტების საფუძველზე მონაწილეობენ. მათ შორის წარმოდგენილები არიან სირიის ომში, ასევე საბრძოლო მოქმედებებში იყვნენ ჩართული და სეპარატისტების გვერდით იბრძოდნენ უკრაინაში, დონბასში.