ვენესუელის პრეზიდენტი თავდასხმაში კოლუმბიის ხელისუფლებას ადანაშაულებს. მთავარი

4 აგვისტოს კარაკასში ვენესუელის პრეზიდენტ ნოკოლას მადუროს თავს დაესხნენ. პრეზიდენტი ვენესუელის ნაციონალური გვარდიის შექმნის 81-ე წლისთავისადმი მიძღვნილ აღლუმზე სიტყვით გამოდიოდა. ქვეყნის ინფორმაციის სამინისტროს ცნობით, მას დრონებზე დამაგრებული ასაფეთქებლებით შეუტიეს.

აღლუმს ადგილობრივი ტელევიზია პირდაპირ ეთერში გადასცემდა. კადრებზე ჩანს, რომ მადურო ლაპარაკს წყვეტს. ის, მისი მეუღლე და სამხედრო ჩინოსნები შეშინებულები მაღლა იხედებიან, რის შემდეგაც გამოსახულებას ცვლის მოედანზე განლაგებული ჯარების კადრი. ცოტა ხანში სამხედროები პანიკაში გარბიან.

Wow. Something major happened during Maduro's speech that caused the cameras to cut out and the parading soldiers and spectators to scatter into cover. Gunfire or possibly a transformer explosion #Venezuela pic.twitter.com/7Sxc5OmXkJ

— Jimmy Rushmore (@JimmySecUK) August 4, 2018

პრეზიდენტი და სხვა პოლიტიკოსები თავდახმის შედეგად არ დაშავებულან. დრონები დროულად ჩამოაგდეს. მცველებმა მადუროს ტყვიაგაუმტარი ფარები გადააფარეს. თვითმხილველები ამბობენ, რომ აღლუმის ჩატარების ადგილიდან სულ ცოტა ორი ძლიერი აფეთქების ხმა გაისმა. ვენესუელის ხელისუფლების ცნობით, დაჭრილია ნაციონალური გვარდიის შვიდი სამხედრო მოსამსახურე.

Covering the President (no easy task). pic.twitter.com/md3hduArV8

— Caracas Chronicles (@CaracasChron) August 5, 2018

მადურო თავდასხმაში კოლუმბიის ხელისუფლებას ადანაშაულებს. სატელევიზიო მიმართვაში ვენესუელის ლიდერმა მეზობელი სახელმწიფო და პირადად მისი პრეზიდენტი ხუან მანუელ სანტოსი დაადანაშაულა, თუმცა ამის დამადასტურებელი არანაირი მტკიცებულება არ წარუდგენია. კოლუმბიის ხელისუფლებაში ამ ბრალდებებს უკვე უწოდეს აბსურდული. ამასთან, მადურომ განაცხადა, რომ თავდასხმის დაფინანსებასთან დაკავშირებული ზოგიერთი ადამიანი ცხოვრობს ამერიკის შტატ ფლორიდაში და აშშ-ის პრეზიდენტ დონალდ ტრამპს „ამ ტერორისტულ ჯგუფებთან ბრძოლისაკენ“ მოუწოდა. სახელმწიფო დეპარტამენტში ჯერჯერობით თქვეს ის, რომ კარაკასის ამბებს აკვირდებიან. ვენესუელის პრეზიდენტმა ასევე განაცხადა, რომ თავდასხმაში ეჭვმიტანილი რამდენიმე ადამიანი დაკავებულია.

პრეზიდენტზე თავდასხმის შესახებ პასუხისმგებლობა ნაკლებად ცნობილმა დაჯგუფებამ აიღო. ამ დაჯგუფებას ჰქვია „მაისურებიანი ჯარისკაცების ნაციონალური მოძრაობა“. „ჩვენ დავამტკიცეთ, რომ ისინი მოწყვლადები არიან. დღეს ჩვენ არ გაგვიმართლა, მაგრამ ეს ხოლოდ დროის საკითხია“, - დაწერეს დაჯგუფების წარმომადგენლებმა Twitter-ზე. ადგილობრივმა პრესამ დაჯგუფებას ვენესუელის პოლიციის ოფიცრის, ოსკარ პერესის მიმდევრები უწოდა. პერესმა ვერტმფრენი გაიტაცა და ქვეყნის უზენაეს სასამართლოს ციდან ყუმბარები დაუშინა.

მადურო რამდენიმე თვის წინ ხელახლა აირჩიეს. ნიკოლას მადურო ვენესუელის ხელისუფლებაში 2013 წელს, პრეზიდენტ უგო ჩავესის გარდაცვალების შემდეგ მივიდა. 2018 წლის მაისში ის სახელმწიფოს მეთაურად ხელახლა, 6 წლით აირჩიეს. ზოგიერტმა ქვეყანამ არჩევნების შედეგები არ არიარა და კარაკასიდან ელჩები გაიწვია. ვენესუელის ოპოზიცია მადუროს აქტიურად ებრძვის და პროტესტს არ წყვეტს, მიაჩნია რა, რომ ის პასუხისმგებელია ქვეყანაში შექმნილ ეკონომიკურ კრზისზე.