ერდოღანი: აშშ-მა ამერიკელი მღვდელი ამჯობინა ნატოს სტრატეგიულ მოკავშირე ანკარას

თურქეთის პრეზიდენტმა რეჯეფ თაიფ ერდოანმა კვლავ მოუწოდა მოქალაქეებს, რათა გაყიდონ დოლარები და ევროები და ხელი შეუწყონ ეროვნული ვალუტის გამყარებას, რომელიც განგრძობს დევალვაციას ეკონომიკური გამოწვევების და აშშ-თან გართულებული ურთიერთობების გამო. ამის შესახებ რადიო თავისუფლება წერს.

თურქეთის ჩრდილო-აღმოსავლეთ ქალაქ უნეში, მხარდამჭერების წინაშე სიტყვით გამოსვლის დროს, თურქეთის პრეზიდენტმა სამწუხარო უწოდა იმ ფაქტს, რომ აშშ-მა ამერიკელი პასტორ ენდრიუ ბრანსონი ამჯობინა ნატოს სტრატეგიულ მოკავშირე ანკარას.

თურქეთის ხელისუფლება ბრანსონს ბრალს დებს ჯაშუშობაში, ტერორიზმსა და 2016 წლის სახელმწიფო გადატრიალებასთან კავშირში. აშშ-ის პრეზიდენტმა დონალდ ტრამპმა თურქეთს მოსთხოვა პასტორის გათავისუფლება, რაც ერთ-ერთი ყველაზე არსებითია აშშ-სა და თურქეთს შორის არსებულ უთანხმოებათა შორის.

ბრანსონი, მეუღლესთან ერთად, თურქეთში, ქალაქ იზმირში, 23 წლის განმავლობაში ცხოვრობდა და ქრისტიანული ეკლესიის მოძღვარი იყო. ენდრიუ ბრანსონი 2016 წლის დეკემბრიდან თურქეთში პატიმრობაშია.

10 აგვისტოს ტრამპმა განაცხადა, რომ მან ვიზირება გაუკეთა ტარიფების გაორმაგებას თურქეთიდან იმპორტირებულ ალუმინსა და ფოლადზე. თურქეთი აცხადებს, რომ ვაშინგტონის ამ ნაბიჯს უპასუხოდ არ დატოვებს.

Bloomberg-ის ცნობით, მხოლოდ 10 აგვისტოს თურქეთის ეროვნული ვალუტა ამერიკულ დოლართან 13.5%-ით გაუფასურდა, რითაც ახალი რეკორდი მოხსნა. ამ დროისთვის, 1 აშშ დოლარის ღირებულება 5.90-6.00 ლირას შორის მერყეობს. ლირის მდგომარეობა ამერიკის მიერ გასულ კვირას დაწესებულმა სანქციებმა მნიშვნელოვნად გააუარესა.