კიმ ჩენ ინის ძმის მკვლელობაში ეჭვმიტანილი ქალები პატიმრობაში დატოვეს

მალაიზიის სასამართლომ დაადგინა, რომ ის მტკიცებულებები, რომლებიც ჩრდილოეთ კორეის ლიდერის, კიმ ჩენ ინის ნახევარძმის, კიმ ჩენ ნამის მკვლელობის საქმეში არსებობს, საკმარისია იმისთვის, რომ დაკავებული ორი ქალი პატიმრობაში დატოვონ. ამის შესახებ BBC წერს. 

გამოძიების მტკიცებით, აეროპორტის სათვალთვალო კამერებით გადაღებული ჩანაწერები, რომლებშიც დაკავებული ქალები ჩანან, საკმარისია იმისთვის, რომ მათ წინააღმდეგ დაწყებული გამოძიება გაგრძელდეს. ვიდეოზე ჩანს, რომ ღია ფერის ტანსაცმელში გამოწყობილი კაცი, სავარაუდოდ, კიმ ჩენ ნამი, საინფორმაციო ტაბლოსთან დგას, როდესაც მას უკნიდან თავს ესხმის თეთრმაისურიანი ქალი. რამდენიმე წამის განმავლობაში მას კაცის თავი ხელით უჭირავს, შემდეგ ხელს უშვებს და ხალხში იკარგება. კაცი უსაფრთხოების სამსახურის წარმომადგენლებს უახლოვდება და სახეს აჩვენებს, რის შემდეგაც ორი ადამიანის თანხლებით სამედიცინო პუნქტისკენ მიდის. ქალების ადვოკატები ამტკიცებენ, რომ მათ არანაირი მოტივი არ გააჩნდათ ჩრდილოეთ კორეის ნახევარძმის მოსაკლავად. 

იმ შემთხვევაში, თუ სასამართლო ქალებს გაამტყუნებს, მათ სიკვდილით დასჯა ელით. 

პოლიცია ამ დრომდე ეძებს სხვა ეჭვმიტანილებს - 4 კაცს, რომლებიც ამ დრომდე იმალებიან. 

ჩრდილოეთ კორეის პრეზიდენტის, კიმ ჩენ ინის ძმა კუალა-ლუმპურის აეროპორტში 13 თებერვალს მოკლეს. გამოძიებამ მკვლელობაში ეჭვმიტანილი 3 პირი დააკავა. თავდასხმისას ტოქსიკური ნივთიერება VX Nerve Agent-ი გამოიყენეს. ამ საწამლავს გემო და სუნი არ გააჩნია, ანგრევს ორგანიზმის ნერვულ სისტემას. ინჰალაციის დროს, სავარაუდოდ, 30-50 მგ საკმარისია. ათი მილიგრამი საკმარისია, რომ ამას ფატალური შედეგი მოჰყვეს.