რუსეთის წინააღმდეგ აშშ-ის ახალი სანქციები აგვისტოს ბოლომდე ამოქმედდება

დღეს, 22 აგვისტოს, ცნობილი გახდა, რომ რუსეთის წინააღმდეგ ამერიკის შეერთებული შტატების ახალი სანქციების პირველი ნაწილი, რომელიც ბრიტანეთის ქალაქ სოლსბერიში რუსეთის სამხედრო სადაზვერვო სამმართველოს ყოფილი პოლკოვნიკის, ბრიტანული სპეცსამსახურების აგენტის, სერგეი სკრიპალისა და მისი ქალიშვილის ნერვულ-პარალიტიკური ნივთიერებით მოწამვლაში რუსეთის მონაწილეობის გამო მიიღეს, აგვისტოს ბოლომდე ამოქმედდება. ინფორმაციას "რადიო თავისუფლება" ავრცელებს.

ვაშინგტონში სჯერათ, რომ რუსეთმა დაარღვია 1991 წლის ამერიკული კანონი ქიმიური და ბიოლოგიური იარაღის კონტროლისა და მისი სამხედრო მიზნებისთვის გამოყენების აკრძალვის შესახებ. საპასუხოდ მოსკოვში თქვეს, რომ ქიმიური იარაღი უკვე გაანადგურეს.

სანქციებით, რომელიც აშშ-ს სახელმწიფო დეპარტამენტმა მიიღო, რუსეთში იკრძალება იმ საქონლის შეტანა, რომელიც ნაციონალური უსაფრთხოების სფეროსა და ენერგეტიკის სფეროში გამოიყენება.

თუ რუსეთი ქიმიური იარაღის სფეროში საერთაშორისო ექსპერტებთან თანამშრომლობაზე უარს განაცხადებს, სამი თვის შემდეგ სანქციების მეორე რაუნდი ამოქმედდება. კერძოდ, აიკრძალება აშშ-ში „აეროფლოტის“ ფრენები და მინიმუმამდე შემცირდება ორმხრივი ვაჭრობა.

რუსეთის ვაჭრობისა და მრეწველობის მინისტრმა, დენის მანტუროვმა მედიას განუცხადა, რომ ახალი სანქციები უეჭველად დააზარალებს გარკვეულ მაღალტექნოლოგიურ სფეროებს, მათ შორის თავდაცვის სამრეწველო კომპლექსს, თუმცა, მნიშვნელოვანი ზიანი არ მიადგებათ.

8 აგვისტოს აშშ-ის სახელმწიფო დეპარტამენტმა განაცხადა, რომ სოლსბერიში სკრიპალების „ნოვიჩოკით“ მოწამვლის დადასტურების შემდეგ აშშ რუსეთს სანქციებს დაუწესებდა. 

აშშ, ბრიტანეთი და დასავლეთის სხვა ქვეყნები რუსეთის მთავრობას სდებენ ბრალს მარტში, ინგლისის ქალაქ სოლსბერიში რუსეთის ყოფილი ორმაგი აგენტის, სერგეი სკრიპალის და მისი ქალიშვილის, იულიას მოწამვლაში.

დიდი ბრიტანეთში ეს "ნოვიჩოკით "მოწამვლის უკანასკნელი შემთხვევა არ ყოფილა. საავადმყოფოში „ნოვიჩოკით“ მოწამვლის გამო 9 ივლისს გარდაიცვალა 44 წლის დაუნ სტარჯესი, ხოლო მისი მეუღლე გადარჩა.