Facebook-მა და Twitter-მა რუსეთთან და ირანთან დაკავშირებული ასობით გვერდი წაშალეს

კომპანია Facebook-ს ეჭვი გაუჩნდა, რომ რუსეთი და ირანი სოცქსელში ქმნიან გვერდებს, ჯგუფებს და ექაუნთებს, რომლებსაც იყენებენ იმისთვის, რომ „სხვები შეცდომაში შეეყვანოთ მათი ვინაობის და საქმიანობის შესახებ“. სოცქსელში აღნიშნეს, რომ ირანულ და რუსულ კომპანიებს შორის კავშირი ან კოორდინაცია არ არსებობდა.

„კოორიდინირებულ არაავთენტურ ქმედებებში“ დაადანაშაულეს ირანთან, მათ შორის ირანის სახელმწიფო მედიასაშუალებებთან დაკავშირებული 652 გვერდი. ამ გვერდების საქმიანობა „ფეისბუკსა“ და „ინსტაგრამში“ გათვლილი იყო მომხმარებლებზე ახლო აღმოსავლეთიდან, ლათინური ამერიკიდან, დიდი ბრიტანეთიდან და აშშ-დან. ზოგიერთი ექაუნთი 2012 წლიდან არსებობდა. „ფეისბუკიდან“ წაშლილ ყველაზე პოპულარულ გვერდს 813 ათასი გამომწერი ჰყავდა. ზოგიერთი ექაუნთი „ფეისბუკსა“ და „ინსტაგრამში“ რეკლამას ყიდულობდა.

კომპანიაში რუსეთიდან მართული წაშლილი გვერდების რაოდენობას არ აზუსტებენ. Facebook-ში განაცხადეს, რომ დაბლოკეს ის გვერდები, რომლებიც მანამდე აშშ-ის მთავრობამ განსაზღვრა, როგორც რუსულ დაზვერვასთან დაკავშირებული გვერდები. ამ გვერდების და ექაუნთების ნაწილი მანამდე, 2016 წლის აშშ-ის საპრეზიდენტო არჩევნებამდე ჰაკერული თავდასხმების გამო წაშალეს. დანარჩენი გვერდების შინაარსი, რომლებზეც აქტიურობა უფრო ახლახან დაფიქსირდა, სირიის და უკრაინის მოვლენებს უკავშირდებოდა. Facebook-ში თქვეს, რომ ამ გვერდებზე აშშ-ის წინააღმდეგ მიმართული საქმიანობა არ შეუნიშნავთ.

მას შემდეგ, რაც Facebook-მა ყალბი გვერდების წაშლის შესახებ განაცხადა, 284 ექაუნთი დაბლოკა Twitter-მაც. კომპანიის ცნობით, ეს გვერდები „კოორდინირებულ მანიპულაციებში“ მონაწილეობდნენ და სავარაუდოდ, ირანში შეიქმნა. Twitter-ში აღნიშნეს, რომ გამოძიების დახმარებისათვის ისინი სხვა კომპანიებთან და სამართალდამცავ ორგანოებთან ითანამშრომლებენ.

2018 წლის აპრილში, Facebook-მა განაცხადა, რომ წაშალა „ფეისბუკის“ და ინსტაგრამის“ დაახლოებით 270 გვერდი, რომლებსაც რუსული „ტროლების ფაბრიკა“ აკონტროლებდა. ივლისში „ფეისბუკსა“ და ინსტაგრამზე“ აღმოაჩინეს 32 ექაუნთი, რომლებიც სავარაუდოდ, აშშ-ის ნოემბრის შუალედურ არჩევნებში ჩარევის კამპანიაში მონაწილეობდა. ნაპოვნი გვერდები და ექაუნთები, როგორც მანამდე ისეთ თემებზე მუშაობდნენ, რომლებიც ამერიკულ საზოგადოებაში დაპირისპირებას იწვევდა. კომპანიამ გვერდები რუსეთს ვერ დაუკავშირა, მაგრამ Facebook-ის წარმომადგენლები მიიჩნევენ, რომ ეს კავშირი სავარაუდოა.

19 აგვისტოს უსაფრთხოების საკითხებში აშშ-ის პრეზიდენტის მრჩეველმა ჯონ ბოლტონმა განაცხადა, რომ აშშ-ის შუალედურ არჩევნებში პოტენციურად ოთხი ქვეყნის ჩარევის საფრთხეა. ეს ქვეყნებია, რუსეთი, ირანი, ჩინეთი და ჩრდილოეთ კორეა. ბოლტონმა აღნიშნა, რომ ეს ქვეყნები „ყველაზე მეტ შეშფოთებას იწვევს“. მისი თქმით, ამერიკის ხელისუფლება ყველაფერს აკეთებს ამ ჩარევის თავიდან ასაცილებლად.

2018 წლის ნოემბერში აშშ-ში შუალედური არჩევნები ტარდება, რომელზეც სრულად გადაირჩევენ აშშ-ის წარმომადგენლობით პალატას, ასევე სენატორების მესამედს. გარდა ამისა, 39 შტატში გუბერნატორის არჩევნები ჩატარდება.