პესკოვი: საერთაშორისო კანონმდებლობით სანქციები არალეგიტიმურია

რუსეთის პრეზიდენტის ვლადიმერ პუტინის პრესსმდივანმა დიმიტრი პესკოვმა კრიტიკული განცხადება გააკეთა მას შემდეგ, რაც აშშ-მა "შავ სიაში" რუსეთის კიდევ 27 მოქალაქე და 6 კომპანია შეიყვანა. ამის შესახებ ინფორმაციას "რადიო თავისუფლება" ავრცელებს.

ვაშინგტონის თქმით, მათ კავშირი აქვთ რუსეთის სამხედრო და სადაზვერვო სააგენტოებთან. კრემლის პრესმდივანმა, დიმიტრი პესკოვმა თქვა, რომ სანქციებს ლეგიტიმურობა არ აქვთ საერთაშორისო კანონმდებლობით და იქვე იხუმრა, რომ ვაშინგტონი "ისეთი სიხშირით იყენებს ამ პრაქტიკას, რომ სიქა გაგძვრება, ამგვარ არამეგობრულ ჟესტებს სათითაოდ რომ უპასუხოო." 

თუმცა, პესკოვმა აღნიშნა, რომ მოსკოვი საპასუხო ნაბიჯს მაინც გადადგამს. "ეჭვი არავის შეეპაროს, რომ ჩვენ მუდამ ვიცავდით და მომავალშიც დავიცავთ პასუხის გაცემის პრინციპს",- განაცხადა მან.

სიას დაემატა კერძო სამხედრო კომპანია „ვაგნერი“, „ინტერნეტ-გამოძიების სააგენტო“, ევგენი პრიგოჟინის კომპანიები - „კონკორდ მენეჯმენტი და კონსალთინგი“ და „კონკორდ ქეითერინგი“ და თავად ევგენი პრიგოჟინიც. ასევე, „ტროლების ფაბრიკის“ და ГРУ-ს თანამშრომლები, რომლებსაც აშშ-ის არჩევნებში ჩარევაში ადანაშაულებენ.

გარდა ამისა, იმავე კანონის ფარგლებში, აშშ-მა რუსეთისგან სამხედრო ტექნიკის შეძენის გამო, სანქციები დააწესა ჩინეთის ჯარების მომზადების დეპარტამენტზე, ჩინეთის ცენტრალური სამხედრო საბჭოსა და მის ხელმძღვანელზე.

ჩინეთი აშშ-ს დაწესებული სანქციების დაუყოვნებლივ გაუქმებას ითხოვს.ახლახანს ჩინეთმა რუსეთისგან Су-35-ის ტიპის ათი ერთეული ავიაგამანადგურებელი და საზენიტო-სარაკეტო კომპლექსი С-400 შეიძინა. სანქციების თანახმად, ჩინეთის სამხედრო საბჭოსა და მისი ხელმძღვანელის, ლი შანფუს ანგარიშები გაიყინება და ყველა საბანკო ოპერაცია დაიბლოკება.