რა თქვა დონალდ ტრამპმა გაეროში სიტყვით გამოსვლისას. მთავარი

აშშ-ის პრეზიდენტი დონალდ ტრამპი გაეროს 73-ე ასამბლეაზე სიტყვით გამოსვლისას თავს დაესხა ირანის ლიდერებს და ისინი ახლო აღმოსავლეთში ქაოსის, სიკვდილის დათესვასა და ნგრევაში დაადანაშაულა, - წერს BBC. 

თეთრი სახლის ლიდერმა ასევე განაცხადა, რომ აშშ გახდა უფრო ძლიერი, მდიდარი და უსაფრთხო. მისი თქმით, მისმა ადმინისტრაციამ ისეთ შთამბეჭდავ შედეგებს მიაღწია, როგორი შედეგებისთვისაც არ მიუღწევია აშშ-ის ისტორიაში არცერთ სხვა ადმინისტრაციას. ამ სიტყვებს დარბაზიდან სიცილი მოჰყვა, რამაც პრეზიდენტი არ დააბნია, პირიქით მან პასუხად გაიცინა და თქვა „ასეთ რეაქციას არ ველოდი“.

დონალდ ტრამპმა ჩრდილოეთ კორეასთან ურთიერთობის გაუმჯობესებასა და ჩინეთთან სავაჭრო ურთიერთობებში მკაცრი მიდგომების შესახებაც ილაპარაკა.

ტრამპის გამოსვლის ერთ-ერთი ლეიტმოტივი იყო, რომ აშშ-ს აქვს უფლება მსოფლიოში საკუთარი პოლიტიკა აწარმოოს. „მე პატივისცემით ვეპყრობი ამ აუდიტორიაში თითოეული ქვეყნის უფლებას იცხოვროს თავისი წეს-ჩვეულებების, ტრადიციების და რწმენის მიხედვით. აშშ არ გასწავლით თქვენ როგორ უნდა იცხოვროთ და ილოცოთ. უბრალოდ ჩვენ გთხოვთ, რომ სანაცვლოდ პატივი სცეთ ჩვენს სუვერენიტეტს“, - განაცხადა მან.

აშშ-ის პრეზიდენტმა ასევე თქვა, რომ
 
- მსოფლიო სავაჭრო სისტემას ცვლილებები სჭირდება. აშშ მუშაობს სავაჭრო დისბალანსის აღმოფხვრაზე, ამიტომ ზოგიერთ ქვეყნებთან სავაჭრო ხელშეკრულებებს ცვლის.

- OPEC-ის ქვეყნები დანარჩენ სახელმწიფოებს ძარცვავენ. ტრამპს უნდა, რომ მათ შეწყვიტონ ნავთობზე ფასის გაზრდა და დაიწყონ მისი შემცირება. 

- სირიის კონფლიქტთან დაკავშირებული ნებისმიერი გადაწყვეტილება უნდა მოიცავდეს ირანის მიმართ სტრატეგიას.

- აშშ სთხოვს ყველა ქვეყანას იზოლაციაში მოაქციოს ირანის რეჟიმი მანამ, სანამ თეირანი განაგრძობს აგრესიულ ქცევას; ირანის წინაარმდეგ დამატებით სანქციებს 5 ნოემბერს აღადგენენ.

- მსოფლიოს ხალხები უნდა დაუპირისპირდნენ სოციალიზმს და ტანჯვას, რომელიც მას მოაქვს. ყველა ქვეყანა უნდა შეუერთდეს აშშ-ის მოწოდებას ვენესუელაში დემოკრატიის აღსადგენად. 
  
- გერმანიამ დაუყოვნებლივ უნდა შეცვალოს კურსი, რომ ბოლომდე დამოკიდებული არ გახდეს რუსულ ენერგორესურსებზე.

- აშშ უარყოფს გლობალიზმის თეორიას და სწამს პატრიოტიზმის დოქტრინის, ამიტომ უარს ამბობს საერთაშორისო სისხლის სამართლის სასამართლოს აღიარებასა და მხარდაჭერაზე.

- აშშ არ აპირებს გაეროს ადამიანის უფლებების საბჭოში დაბრუნებას, ვიდრე იქ რეალური რეფორმები არ გატარდება.

- ტრამპმა შეაქო ინდოეთი, რომელმაც მილიონობით ადამიანი სიღარიბიდან „საშუალო კლასის“ დონემდე აიყვანა; მიესალმა საუდის არაბეთის თამამ რეფორმებს; ისრაელი დაახასიათა, როგორც აყვავებული დემოკრატიული სახელმწიფო და თქვა რომ პოლონეთი არის ქვეყანა, რომელიც საკუთარ სუვერენიტეტს იცავს.