ამერიკელები ტრამპის გარემოცვის რუსეთთან შესაძლო კავშირებზე გამოძიებას ემხრობიან

ამერიკელთა 60%-ზე მეტი მომხრეა, რომ პრეზიდენტ ტრამპის წინასაარჩევნო კამპანიის წევრების რუსეთთან შესაძლო კავშირზე დამოუკიდებელი გამოძიება ჩატარდეს. რუსული RIA-ს ცნობით, ამის შესახებ Quinnipiac University-ის მიერ ჩატარებული გამოკითხვა მეტყველებს.

გამოკითხულთა 66%-ი დამოუკიდებელი საგამოძიებო კომისიის შექმნის მომხრეა, ამ ინიციატივის წინააღმდეგ კი 29%-ი გამოდის. ამასთან, გამოკითხულთა 65%-ი მიიჩნევს, რომ რუსეთის შესაძლო მონაწილეობა ამერიკის პრეზიდენტის წინასაარჩევნო კამპანიაში მნიშვნელოვანი საკითხია და ისინი ამის გამო შეშფოთებას გამოთქვამენ.

Quinnipiac University-მა გამოკითხვა 16-იდან 21-მარტის ჩათვლით ჩაატარა და მასში 1056-მა ამერიკელმა მიიღო მონაწილეობა. ამ დროისთვის ტრამპის გუნდის წევრების რუსეთთან შესაძლო კავშირების შესახებ გამოძიებას აშშ-ის კონგრესი ატარებს. 

ტრამპის გუნდისა და რუსეთის სპეცსამსახურების შესაძლო კავშირის შესახებ ინფორმაცია პირველად ამერიკულმა მედიამ გაავრცელა. ამის გამო პრეზიდენტმა ტრამპმა ისინი მკაცრად გააკრიტიკა და დაზვერვის სამსახური მედიისთვის ინფორმაციის მიწოდებაშიც დაადანაშაულა. შესაბამისი პოსტი მან Twitter-ზე გამოაქვეყნა. პრეზიდენტი ამბობდა, რომ გამოძიების ფედერალური ბიუროს და/ან ეროვნული უსაფრთხოების სააგენტოს თანამშრომლები უკანონოდ აწვდიან ინფორმაციას The New York Times-ს და The Washington Post-ს. მან CNN-ისა და MSNB-ის საინფორმაციო გამოცემებიც გააკრიტიკა.

2017 წლის დასაწყისში CNN-ი და The Washington Post-ი იუწყებოდნენ, რომ ვიდრე ჯეფ სეშნს აშშ-ის გენერალურ პროკურორად და იუსტიციის მინისტრად დანიშნავდნენ, მას ურთიერთობა ჰქონდა ამერიკაში რუსეთის ელჩ სერგეი კისლიაკთან. თებერვლის დასწყისში ცნობილი გახდა რუს დიპლომატთან პრეზიდენტის მრჩევლის მაიკლ ფლინის სატელეფონო საუბრების შესახებ. საბოლოოდ, ფლინი გადადგა.
ტრამპის გუნდს მოსკოვთან არაფორმალურ კავშირებში ადანაშაულებენ. თავად ტრამპი რუსეთთან რაიმე ტიპის პოლიტიკურ ან საქმიან კავშირებს უარყოფს.