გახმაურებული მკვლელობისთვის ძებნილი ბრიტანელი ჯეკ შეპარდი თბილისში პოლიციას ჩაჰბარდა

საქართველოს შინაგან საქმეთა სამინისტრომ დაადასტურა, რომ ბრიტანულ პოლიციასთან ერთად ძებნილის ადგილმდებარეობის დადგენაზე მუშაობდა. ჯეკ შეპარდი მდინარე ტემზაზე, ჩქაროსნულ ნავზე მეგობარი გოგოს მკვლელობაშია ბრალდებული. ამის შესახებ BBC წერს. 

31 წლის შეპარდს 2018 წლის ივლისში 24 წლის შარლოტა ბრაუნის მკვლელობისთვის ექვსი წლით თავისუფლების აღკვეთა მიუსაჯეს. მსჯავრდებული სასამართლო პროცესზე არ გამოცხადდა, რადგან 2018 წლის მარტში დიდი ბრიტანეთი დატოვა. მტკიცებულებები აჩვენებს, რომ ჯეკ შეპარდი საქართველოს დედაქალაქ თბილისში დააფიქსირეს, - წერს გამოცემა.

აღმოჩნდა, რომ ჯეკ შეპარდი საქართველოში იყო და ის დღეს თბილისში პოლიციას ჩაჰბარდა. ინფორმაცია imedinews-ს შინაგან საქმეთა სამინისტროში დაუდასტურეს.

შარლოტა (ჩარლი) ბრაუნი, ლონდონში ბიზნესის განვითარების კონსულტანტად მუშაობდა

შეპარდი 2018 წლის 26 იანვარს ლონდონში მდებარე ინგლისისა და უელსის ცენტრალურ კრიმინალურ სასამართლოში მაშინ გამოჩნდა, როდესაც ის დაუდევრობით მომხდარი მკვლელობის მოტივით გაამართლეს. 

ის მოსამართლე რიჩარდ მარკსმა უპირობო გირაოთი გაათავისუფლა. 

ჯეკ შეპარდის ბრალდებულად ცნობის შემდეგ მისი დაკავების ორდერი გაიცა. 

BBC-ის პუბლიკაციაში ვკითხულობთ, რომ ბრალდებულის პოვნის შემთხვევაში საქართველოსა და დიდ ბრიტანეთს შორის არსებული დიპლომატიური შეთანხმების საფუძველზე მისი ექსტრადირება განხორციელდება. 

შეპარდის საქმეზე ახალი ცნობები მას შემდეგ გავრცელდა, რაც მოკლული ბრაუნის ოჯახი დიდი ბრიტანეთის შინაგან საქმეთა მინისტრ საჯიდ ჯავიდს 22 იანვარს შეხვდა. 

ჯავიდის განმარტებით, ისინი ყველაფერს გააკეთებდნენ რათა სამართალი დროულად აღსრულებულიყო.

ჯეკ შეპარდი და შარლოტა ბრაუნი ერთმანეთს სამაჭანკლო ვებგვერდ OkCupid-ის მეშვეობით 2015 წლის 8 დეკემბერს შეხვდნენ. ირკვევა, რომ ბრალდებულმა შეპარდმა ბრაუნთან პაემანზე რესტორანში 150 ფუნტი სტერლინგი დახარჯა, რის შემდეგაც ქალი, მისი მტკიცებით, თავის კუთვნილ ჩქაროსნულ ნავში ჩასვა. ბრაუნი და შეპარდი შუაღამისას, ხიდთან ახლოს, წყალში არსებულ ნარჩენებთან შეჯახებისას ნავიდან გადავარდნენ. 

პუბლიკაციაში ვკითხულობთ, რომ შეპარდი იმ დროს იპოვეს, როცა ნავის კორპუსს ეჭიდებოდა, ამ დროს კი ბრაუნი წყლიდან უგონო მდგომარეობაში ამოიყვანეს. 

წინასწარმა მოკვლევამ დაადგინა, რომ ბრაუნი ცივ წყალში გაიყინა და დაიღუპა.