ანტვერპენში მძარცველებმა ბანკში კანალიზაციაში გათხრილი გვირაბით შეაღწიეს

3 თებერვალს ანტვერპენში BNP Paribas Fortis-ის ბანკი გაძარცვეს. ჯერჯერობით ცნობილი არ არის რა ოდენობის თანხა გაიტაცეს დამნაშავეებმა, თუმცა ჟურნალისტების ამბობენ, რომ მძარცველებმა 20-დან 30-მდე შემნახველი სალარო გახსნეს, სადაც ფული, ძვირფასეულობა და კლიენტების პირადი ნივთები ინახებოდა. ამის შესახებ Meduza წერს.

მძარცველები ბანკის საცავში საკანალიზაციო გაყვანილობით კვირას დილით შევიდნენ, რისთვისაც მათ ორი გვირაბი გათხარეს. პირველი გვირაბი ბანკიდან 400 მეტრის დაშორებით მდებარე სახლიდან იწყებოდა და კანალიზაციის გაყვანილობაში სრულდებოდა. მეორე გვირაბი კი კანალიზაციიდან ბანკის სათავსომდე იყო გაყვანილი.

ძარცვის შესახებ ცნობილი მხოლოდ კვირას დღისით გახდა, როდესაც ბანკში სიგნალიზაცია ჩაირთო. პოლიციის მისვლის მომენტში დამნაშავეები დაიმალნენ. უცნობია მოუწიათ თუ არა მათ დასამალად იმავე გზის გავლა, რომლითაც ბანკში მოხვდნენ. დამნაშავეების შესახებ ცნობილი ჯერ არაფერია.

Bekijk hier de foto's van de tunnel langs waar de inbrekers de kluis van BNP Paribas Fortis zijn binnen geraakt. #atvnieuws #kraak #BNPParibasFortis https://t.co/8S2cOcfWsu pic.twitter.com/oa5A186MlX

— atv.be (@atvbe) February 5, 2019

Bankroof Belgiëlei: zo zag de tunnel er vanbinnen uit https://t.co/hAiwVZ9Ni1 pic.twitter.com/ETqaCJC93x

— Gazet van Antwerpen (@gva) February 5, 2019

ორშაბათს ბანკთან კლიენტები შეიკრიბნენ, რათა გაეგოთ მათი შემნახველი სალაროები იყო გატეხილი თუ არა, თუმცა თავდაპირველად ეს ინფორმაცია ბანკმა არ მიაწოდა. როგორც The Telegraph-ი წერს, კლიენტებს შორის დიდი ნაწილი ებრაელი და ინდოელი ძვირფასეულობით მოვაჭრეები არიან - ბანკი ე.წ. ალმასების კვარტალთან ახლოს მდებარეობს. 

ჟურნალისტებმა ბანკის ძარცვის ტაქტიკა მხატვრული ფილმის "ოუშენის მეგობრების" სცენარს შეადარეს. ადგილობრივი კომპანია, რომელიც ჩამდინარე წყლებს წმენდს, ამბობს, რომ დამნაშავეების გეგმა მათივე სიცოცხლისთვის ბევრ საფრთხეს შეიცავდა. კომპანიის თქმით, მილების ზომა ზოგიერთ ადგილზე არ აღემატება 1.3 მეტრს, სიგანე კი 80 სანტიმეტრამდეა, ზოგიერთ ადგილზე კი კიდევ უფრო ვიწრო. ასევე, კომპანიის თქმით, ძარცვის დროს რომ გაწვიმებულიყო, კანალიზაცია წყლით სწრაფად გაივსებოდა და მძარცველები დაიხრჩობოდნენ. გარდა ამისა, მძარცველების სიცოცხლეს საფრთხეს უქმნიდა ის გაზებიც, რომლებიც საკანალიზაციო სისტემაში ყალიბდება ხოლმე, გვირაბის გათხრის დროს კი კედლების ჩამოშლის საფრთხე არსებობდა. "ვერ ვხვდები ისინი ცოცხლები როგორ გადარჩნენ", - თქვა ინჟინერმა.