თეა წულუკიანი დეპუტატ სამადაშვილს: თქვენ იკადრეთ უკადრებელი

„თქვენ იკადრეთ უკადრებელი და დამადანაშაულეთ, თურმე ჰააგის სისხლის სამართლის სასამართლოსთან ვთანამშრომლობ სახელმწიფოს ინტერესების წინააღმდეგ, უბრალოდ გეტყვით, გრცხვენოდეთ, - ასე მიმართა საქართველოს იუსტიციის მინისტრმა, თეა წულუკიანმა „ნაციონალური მოძრაობის“ წევრს, სალომე სამადაშვილს, როდესაც პარლამენტში ანგარიშის წარდგენის შემდეგ დეპუტატების შეკითხვებს უპასუხა. 

„ქალბატონო სალომე, თქვენ იკადრეთ უკადრებელი და მე დამადანაშაულეთ, რომ ჰააგის სისხლის სამართლის სასამართლოსთან ვთანამშრომლობ საქართველოს სახელმწიფოებრივი ინტერესების წინააღმდეგ. მე ამაზე თავის მართლებას არ ვაპირებ. უბრალოდ, გეტყვით, გრცხვენოდეთ ყოფილ ელჩს, რომელიც ამას კადრულობს. ქართველმა ჯარისკაცებმა კარგად იციან, ვინ მუშაობს მათი ინტერესების დასაცავად. ისიც ახსოვთ, არაერთი ჯარისკაცი, სამწუხაროდ, რუსებმა რომ მოგვიკლა, როგორ მიატოვეთ და გამოიქეცით ისე, რომ ფეხებს ირტყამდით კეფაში. ამიტომ, მოდით, ნუ იკადრებთ იმას, რაც არ შეგეფერებათ, იმიტომ, რომ ჯიბეში გიდევთ საქართველოს მოქალაქის პასპორტი.

ჰააგასთან თანამშრომლობა სისხლის სამართლის მართლმსაჯულების პროცესში არის ჩვენი სახელმწიფო ინტერესი. ამასთან მიმართებაში, მე, თქვენის ნებართვით, არ დავყოფ დარბაზს იისფრებად და წითლებად, პატრიოტებად, ლიბერალებად, კონსერვატორებად და სოციალისტებად. ეს არის ქართული საქმე. გამოძიება მიმდინარეობს, როგორც ჰააგის პროკურორი ამბობს, სწრაფი ტემპით. მე სხვა ინფორმაციას არ ვფლობ. შემოდის შუამდგომლობები, რომ ჰააგის პროკურატურის წარმომადგენლები დავაკონტაქტოთ მოწმეებს, რომელთა ვინაობის გამხელის უფლება ამ ტრიბუნიდან მე არ მაქვს.

ჩვენ რა თქმა უნდა, ვთნამშრომლობთ ქალბატონი ბენსუდას ოფისთან და არა იმისთვის, რომ საქართველოს ინტერესი დაზიანდეს, არამედ იმისთვის, რომ ქართველების ეთნიკური წმენდა დავამტკიცოთ, იმისთვის, რომ ჩვენი სამხედრო ტყვეების წამება და მკვლელობა დავამტკიცოთ. ამისთვის არ არის საკმარისი განცხადებები. საჭიროა, სამართლებრივი დოკუმენტი არსებობდეს. ისეთი, როგორიც უკვე გვაქვს დეპორტირებულების საქმეზე და როგორიც, იმედი მაქვს, გვექნება ომის საქმეზე სტრასბურგის სასამართლოს გადაწყვეტილების სახით. ამ დოკუმენტებს მომდევნო ხელისუფლება გამოიყენებს, მომდევნო იუსტიციის მინისტრი გამოიყენებს, ვინც არ უნდა იყოს ის“, - განაცხადა იუსტიციის მინისტრმა.

სამადაშვილი დაინტერესდა, „რა გავლენას იქონიებს ჰააგაში მიმდინარე პროცესებზე პრეზიდენტ ზურაბიშვილის განცხადებები იმის თაობაზე, რომ საქართველოს ხელისუფლებამ დაბომბა საკუთარი ტერიტორია, საკუთარი მაცხოვრებლები.   

„მე რას ვფიქრობ ამაზე, ჩემს გამოსვლაში მოგახსენებთ, როგორ თანამშრომლობს ჰააგის ტრიბუნალთან რეალურად თქვენი უწყება და თქვენი პროკურორები ჩვენი ქვეყნის ინტერესების საწინააღმდეგოდ.

ძალიან წარმატებულად კი თვლით ქალბატონო თეა თავს, მაგრამ აშშ-ის სახელმწიფო დეპარტამენტის ანგარიშში პერსონალურად ხართ მოხსენიებული, როგორც ადამიანი, რომელმაც დაანგრია ქვეყანაში ყველანაირი ნდობა პროკურორის და საპროკურორო სისტემის“, - მიმართა სამადაშვილმა წულუკიანს.