წულუკიანი ოპოზიციას: მეგონა გუშინდელი მარცხის შემდეგ ღამე მაინც იმეცადინებდით

მინისტრი, რომლის პარლამენტში დაბარების სურვილი ოპოზიციას, სავარაუდოდ, აღარასოდეს გაუჩნდება. თეა წულუკიანის „მინისტრის საათი“ სესიაზე დღესაც გაგრძელდა. იყო კრიტიკა და ბრალდებები საპარლამენტო ტრიბუნიდან, მაგრამ თეა წულუკიანის წყობიდან გამოყვანა პოლიტიკურმა ოპონენტებმა ვერ შეძლეს.

ურთიერთბრალდებების ერთ-ერთი მიზეზი რუსეთთან დაკავშირებით გაკეთებული განცხადებები გახდა. „ნაციონალური მოძრაობის“ წევრმა, სალომე სამადაშვილმა თეა წულუკიანი იმ განცხადების გამო გააკრიტიკა, რომლითაც მინისტრმა სამადაშვილის მიმართ თქვა, რომ მან უკადრებელი იკადრა.

"როდესაც შეეცდებით, მორალური უპირატესობის პოზიციიდან ესაუბროთ ვინმეს ამ ტრიბუნიდან, იძულებული ვიქნებით, შეგახსენოთ, რომ უკადრებელი არის ის, რომ თქვენი ხელმძღვანელობის ქვეშ პროკურორებმა, არაერთმა პროკურორმა გაუგზავნა წერილი ჰააგის საერთაშორისო სასამართლოს, რომელშიც განაცხადა, რომ ჩვენ ახლა არ გვცალია რუსეთის დანაშაულის გამოძიებისთვის იმიტომ, რომ წინა ხელისუფლების დანაშაული უნდა გამოვიძიოთო,“- განაცხადა „ნაციონალური მოძრაობის“ წევრმა, სალომე სამადაშვილმა.

თეა წულუკიანი მწვავედ გააკრიტიკა “ევროპული საქართველოს” წევრმა, ზურაბ ჭიაბერაშვილმა.

"გუშინ აქ ფურცელს აფრიალებდა ქალბატონი წულუკიანი, არის თუ არა ეს ნოტა. ეპატაჟურად მიმართა ბატონ ბოკერიას. სინამდვილეში ეს ნოტა გაგზავნილია 2014 წელს. 2014 წლის შემდეგ, მას შემდეგ, რაც რუსეთმა არ გაგვცა პასუხი, რატომ არ არის შემდგომი ნოტები გაგზავნილი. მთავარი პრობლემა აქ არის, რომ მართლმსაჯულების საერთო სასამართლო იკითხავს, რატომ აიღო ამხელა, 5-წლიანი პაუზა საქართველომ და რატომ არ აგრძელებდა ნოტებით მიმართვას,“- განაცხადა „ევროპული საქართველოს“ წევრმა, ზურაბ ჭიაბერაშვილმა.

იუსტიციის მინისტრმა თეა წულუკიანმა პარლამენტში, საგაზაფხულო სესიაზე სადაც “მინისტრის საათის” ფორმატით სიტყვით გამოვიდა, “ევროპული საქართველოს” წევრის ზურაბ ჭიაბერაშვილის ცესკოში მუშაობის პერიოდი გაიხსენა და ის წლების წინ არჩევნების გაყალბებაში დაადანაშაულა.

"ამას ჰქვია საარჩევნო უფლების მასიური წართმევა. რაც დააშავა ბატონმა ზურაბ ჭიაბერაშვილმა, რომელიც არამც თუ უკეთესი არ არის ასლან აბაშიძეზე, ზუსტად იგივეა, რაც ასლან აბაშიძე იყო. მისით ამობრწყინდა დემოკრატიის შუქურა “ნაციონალური მოძრაობის” სახით.”, - განაცხადა თეა წულუკიანმა.

თეა წულუკიანის მოსმენა პარლამენტში 20 მარტს, დაახლოებით, 7 საათის განმავლობაში გრძელდებოდა და ის დღესაც გაგრძელდება.